Një ngjarje e rèndë është regjistruar në orët e para të mëngjesit në Shkodër. Dy persona të maskuar me motorçikletë kanë qëlluar me ármë dhe kanë kërcënuar një shtetas në rrugën Shkodër-Velipojë, më konkretisht në afërsi të fshatit Daragjat.
Burime pranë policisë së Shkodrës bëjnë me dije se ngjarja ka ndodhur rreth orës 6 të mengjesit kur dy persona me motor të maskuar i kanë zënë pritë nje mjeti tip benz, ku po udhëtonte një 50 vjeçar, banues në fshatin Darragjat. Sipas dëshmisë së dhënë para policisë nga 50 vjeçari Alban Luka, autorët e kanë ulur në gjunje drejtuesin e mjetit duke e kërcënuar dhe pastaj kanë qëlluar me automatik në ajër.
“Më ulën në gjunjë dhe më kërcënuan, nuk kam pasur konflikte me asnjë njeri”, mësohet të jetë shprehur në Polici Luka, ndërkohë që siç shihet dhe nga pamjet mjeti i tij është bërë shosh nga plumbat e shumtë.
Fatmirësisht si pasojë e kësaj ngjarje nuk ka pasur viktima. Policia po punon për identifikimin e autorëve të kesaj ngjarje të rèndë e cila rikthen maskat në Shkodër, pas disa muajve qetësi.
Njoftimi: Me datë 27.06.2020, rreth orës 06:15, shtetasi A.L, 49 vjeç, banues në fshatin Darragjat, ka njoftuar Sallën Operative se në vendin e quajtur fshati Darragjat, Shkodër, është qëlluar me armë zjarri në drejtim të mjetit të tij, e si pasojë nuk ka persona të dëmtuar por vetëm dëme materiale.
Në vendin e ngjarjes ndodhen shërbimet e Policisë dhe grupi hetimor për sqarimin e rrethanave të kësaj ngjarje.
(E.K/Faxweb.al)
Discussion about this post