Policia Shkodrës ka arrestuar në pikën kufitare të Murriqanit 44-vjeçarin Elton Isufi, një person me precedent të theksuar kriminal. Isufi ose siç njihet ndryshe si Mateo Meto është i dënuar nga autoritetet italiane me 11 vite heqje lire për veprat penale ” Organizatë kriminale”, “Trafikim i lëndëve narkotike” dhe “Trafikimi i armëve”. Ky arrestim erdhi si bashkëpunim i Interpol Tiranës me policinë e qytetit të Shkodrës. 44-vjeçari pritet të ekstradohet në Itali për të vuajtur dënimin e marrë aty.
Njoftimi i plotë i policisë: Muriqan, Shkodër/ Policia Kufitare kap dhe vë në pranga një të kërkuar për llogari të drejtësisë italiane.
Falë shkëmbimit në kohë reale të informacionit mes Policisë Kufitare, Interpol Tiranës dhe DVP Shkodër u vu në pranga 44-vjeçari i dënuar me 11 vite burg për veprimtari kriminale në fushën e narkotikëve.
Shërbimet e Policisë Kufitare të PKK Muriqan, si rezultat i shtimit të kontrolleve, me qëllim parandalimin, evidentimin dhe goditjen e paligjshmërisë, si dhe kapjen e personave në kërkim, gjatë përpunimit të dokumenteve të personave në hyrje të republikës së Shqipërisë, kanë kaluar për intervistim të hollësishëm një shtetas nga Vlora.
Pas intervistimit të hollësishëm nga ana e shërbimeve të Policisë Kufitare dhe pas shkëmbimit të informacionit mes Interpol Tiranës dhe Sektorit për Hetimin e Narkotikëve në DVP Shkodër rezultoi se shtetasi Elton Isufi alias Mateo Meto, 44 vjeç, banues në Vlorë, i cili po kthehej nga Brukseli për në Vlorë, ishte person i shpallur në kërkim ndërkombëtar nga ZQK Interpol Tirana, pasi Gjykata e Apelit Bari, në vitin 2014 e ka dënuar me 11 vjet burg, për veprat penale “Organizatë kriminale”, “Trafikim i lëndëve narkotike” dhe “Trafikimi i armëve” parashikuar nga Kodi Penal Italian.
Materialet procedurale do t’i kalojnë Prokurorisë Pranë Gjykatës së Shkallës së Parë Shkodër, për veprime të mëtejshme, me qellim ekstradimin e këtij shtetasi në Itali