Një nga pyetjet më të sikletshme për çdo bashkëshorte: A mendon se i shoqi i saj ka lidhje apo nuk ka lidhje me drogën.
‘’A beson që Ermali është i pafajshëm?’’, e pyeti në emisionin e tij Ermal Mamaqi, këngëtaren Rezarta Shkurta.
Pasi hezitoi për një moment, Shkurta u përgjigj gjatë duke thënë për bashkëshortin që ka në burg: “Çfarë pyetje! Nuk do doja të më pyesje a beson, se a beson i bie çfarë besoj unë dhe çfarë nuk është në realitet. Meqë vendosa të vij këtu ,nuk do bëj sikur është surprizë kjo pyetje. Unë them ato që janë dhe ti ke drejtën të besosh apo jo.
Ajo çfarë është, ose si nisi, nisi poshtër, po them, ose nisi jo korrekte që nga organet kompetente ku deklaruan se Ermal Hoxha kapet në Xibrakë me 300 mijë euro në makinë kur që këtu nis gënjeshtra se Ermali jo vetëm që nuk kishte këto paratë që janë para fantazmë, por ishim bashkë në Durrës. U thanë edhe shumë gjëra të tjera qesharake, u bë e madhe jeta luksoze, sigurisht, jeta luksoze e tyre se këtë jetë luksoze që ne e kishim bërë, unë s’e kisha parë. U bëra pronare e një Ferrari që është marrë borxh nga shpia filmike “Pro Video” për të realizuar një film.
Ermal Hoxha u penalizua sepse ishte nipi i Enver Hoxhës, u mediatizua aq shumë kjo histori sa duhej futur brenda dhe policia nuk mund të dekonspironin paaftësinë e tyre. Dhe sot kanë kaluar 2 vjet dhe ai vazhdon të qëndrojë brenda”.
Më tej Shkurta e tha qartë se kjo është një padrejtësi ndaj bashkëshortit të saj.
‘’Unë nuk e besoj por e di që kjo është padrejtësi. Një pjesë e mirë e njerëzve përtyin atë çfarë u ofrohet dhe janë të lirë ta bëjnë’’, komentoi te ‘’Xing me Ermalin’’ këngëtarja Rezarta Shkurta e cila ka edhe një vajzë me Ermal Hoxhën, Herën.
