Edhe njëherë tjetër partitëdhe klasa politike në vendin tonë deshtuan për të gjetur rrugën e dialogut dhe marrëveshjeve.
Edhe pse protesta e opozitës vijon prej dy muajsh në shesh palët nuk kanë mundur dot të gjejnë rrugën e marrëveshjeve dhe të ulen së bashku në tryezë.
As kreu i LSI-së me qëndrimet e tij disi në mes nuk ka mundur dot të bindë Ramën dhe Bashën që të lënë retorikën sa një ‘Facebook’ dhe sa të çadra. Edhe njëherë tjetër sytë u hodhën drejt BE-së, te ndërkombëtarët.
Pas takimit të së shtunës mes Ramës dhe Metës ata deklaruan se për gjetjen e dialogut me PD-në do të thërriteshin në ndihmë përfaqësues të Partive Popullore Europiane.
Sipas ‘TCH’ negociatori i mundshëm është gjermani David McAllister. Ai ka kërkuar që të vijë në Shqipëri me një axhendë të përcaktuar më parë.
Për këtë qëllim, janë takuar të shtunën dy negociatorët politikë, Taulant Balla për socialistët dhe Oerd Bylykbashi për demokratët.
Ata pritet të takohen sërish me nisjen e javës së re politike, në një përpjekje për të dakordësuar çështjet e tryezës së dialogut.
Paralelisht me këto përpjekje, parlamenti do të zhvillojë dy seanca plenare, të martën për vettingun dhe të mërkurën për presidentin.
Të dyja këto seanca, ka mundësi të jenë pa produkt. Parlamenti nuk zgjedh dot një komision funksional vettingu pa opozitën, por edhe presidenti, si fillim po trajtohet si një çështje e dialogut ende të munguar me opozitën.
Po kush është David McAllister:
David McAllister, është një politikan gjerman dhe pjesëtar i parlamentit evropian nga Gjermania. Ai është anëtar i Unionit Kristiandemokrat, pjesë e partive popullore evropiane.
Aktualisht, është zëvendës-president i Partive Popullore Evropiane dhe kryeson, bashkë me Joseph Daul, grupin e punës të partive popullore për politikat evropiane. Për më tepër është dhe zëvendës-kryetar i unionit ndërkombëtar demokrat.
Në shkurt të 2017-ës, ai u zgjodh kryesues i komisionit të jashtëm të parlamentit evropian në vend të Elmar Brok dhe në këtë kuadër, është edhe raportues për Serbinë.
McAllister, ka qenë më herët kryeministër i shtetit të Saksonisë së poshtme në Gjermani, duke pasuar Kristian Ulf, ndërsa nga 2014 është zgjedhur pjesëtar i parlamentit evropian.
Avokat me profesion, ai konsiderohej si një yll në rritje i CDU-së, Kristian-demokratëve e madje edhe si pasues i mundshëm i Angela Merkelit.
Ai ka lindur në Berlinin Perëndimor, nga një baba skocez dhe një nënë gjermane. Ai ka shtetësi gjermane dhe britanike edhe pse ka nënvizuar se e ndjen veten tërësisht gjerman. (E.K/SHUPLAKA)
