A do ndodhë kjo gjë? Ylli Manjani: Loja që po i përgatit qeveria opozitës, shenjat nuk më duken të mira

Ish-ministri i Drejtësisë, Ylli Manjani e ka cilësuar një lojë të pistë politike vendimin për amnistinë për të dënuarit.

Duke pasur parasysh se qeverisë i duhen 84 vota për amnistinë, Manjani thotë se qeveria kërkon të joshë opozitën të braktisë bojkotin parlamentar, si dhe fshijë nga axhenda politike e saj kërkesat për dekriminalizim të politikës, garantimin e zgjedhjeve të ndershme dhe drejtësinë e çliruar nga qeveria.

Postimi i Manjanit:

Loja e pisët me amnistinë
————
Qeveria ka përgatitur një amnisti për disa të dënuar. Por nuk i ka 84 vota në Kuvend për ta kaluar.
Në këto kushte amnistia e propozuar nuk motivohet nga humanizmi, por thjesht nga loja politike.

Qeveria kërkon të joshë opozitën të braktisë bojkotin parlamentar. Të fshijë nga axhenda politike e saj kërkesat për dekriminalizim të politikës; garantimin e zgjedhjeve të ndershme dhe drejtësinë e çliruar nga qeveria.
Në rastin më të mirë për qeverinë, një përçarje e mundshme e opozitës do ishte rezultati më i preferuar. Pra një pjesë e deputetëve të paraqiten për të votuar amnistinë, në emër të humanizmit, është qëllimi i preferuar i qeverisë.
A do ndodhë kjo gjë?
Të shohim. Por shenjat nuk më duken të mira…
Për një gjë jam i bindur: kush i jep oksigjen politik këtij modeli që sundon sot është anti-humanist!

(B.H/Faxweb)