Ish-kryeministri Sali Berisha, duke folur për djegien e mandateve, u shpreh në një emision televiziv se nuk përjashtohet që edhe kryebashkiakët të djegin mandatet e tyre.
Sa i përket përjashtimit të deputetëve Rudina Hajdari dhe Myslim Murrizi, ish kryeministri është shprehur se ata përjashtuan veten, pasi nuk mund të ketë dy standarte.
“Përjashtuan veten. Zoti Murrizi ka qenë në grup parlamentar, ka votuar. Nuk di se mund të adoptohen dy standarde”, deklaroi Berisha.
Ish-kryeministri Sali Berisha gjatë intervistës në emisionin “360 Gradë” në Ora News, tha se pavarësisht se e ka artikuluar fillimisht djegien e mandateve, nuk ka ndikuar tek drejtuesit e opozitës.
Beti Njuma: Ju keni qenë i pari që keni artikuluar djegien e mandateve.
Berisha: Është e vërtetë që unë e kam artikuluar në një moment. Për mua dramatik për Parlamentin, të papërsëritshëm, të turpshëm, në një moment që po bëhej gjithçka për të zgjedhur Edi Ramën kryeprokuror qoftë me 69 vota dhe unë mendova se këtu është një Parlament diktatorial.
Beti Njuma: Pas dy vjetësh kush e hodhi këtë ide?
Berisha: Unë kam qenë! Nuk e mohoj! Por një gjë të them, nuk jam unë që e kam nxitur. Disa herë nga ajo kohë, po të ishte për vendim timin personal e digjja, por nuk doja të ndikoja tek të tjerët. Kam pasur zero ndikim tek liderët e opozitës. Unë di të vetëpërmbahem, por nuk kam dashur t’u imponoj atyre një vendim që e di sa i rëndë është.
