Studiuesi Dritan Hoti ka qenë i ftuar këtë të martë në studion e Fax News në emisionin “Me Xhaxhiun”, ku është folur për Presidentin Emanuel Macron dhe qëndrimin e tij për Ballkanin.
I pyetur nëse do të jetë Macron ai që do të marrë rolin kryesor për Ballkanin, rol ky që mbahej deri më tani nga Kancelarja Angela Merkel, Dritan Hoti u shpreh se kjo varet nga potenca ekonomike dhe industriale e Francës.
Angazhimi më i madh në Ballkan nga ana e Macron vjen për dy arsye thotë Dritan Hoti. E para ka të bëjë me formimin e shkollës së diplomacisë që ka ai, e cila e bën të ‘nuhasë’ vorbullën ku po përfshihet situata gjeopolitike në Ballkan.
E dyta lidhet me zgjedhjet Presidenciale në Francë, me Macron që kërkon ta paraqesë veten si ai President i Francës që do të luajë rol në Europën juglindore.
“Së pari. Macron është përfaqësues i shkollës së diplomacisë franceze. Së bashku me Anglinë janë dy shkolat më të rëndësishme të diplomacisë. Macroni është mishërim i shkollës diplomatike franceze. Ata kanë intuitën dhe analizën racionale, që ka të bëjë me dinamikat, apo vorbullën që po përfshihen zhvillimet gjeopolitike ne Ballkan. Prandaj ai bëri disa propozime për të ardhmen e këtij rajoni. Së dyti, kanë të bëjnë me fushatën elektorale Presidenciale. Kërkon ta paraqesë veten si ai President i Francës që premton një rol në Europën juglindore. Roli i një vendi nuk varet nga individi. Çelsi i angazhimit të një vendi është potenca ekonomike, ushtarake, industriale. Gjermania nga ana tjetër e ka bërë gjithmonë Ballkanin si një ‘kopësht të pastër’. A do të jetë Macron që do të zëvendësojë Merkelin nuk varet shumë nga dëshira e Presidentit francez, por nga potenca ekonomike, industriale dhe orientimi i duhur”, tha ai.
(E.H/Faxweb.al)
Discussion about this post