Dje në kryeyqytet u zhvillua një tryezë diskutimesh pas konkluzioneve të Bashkimit Europian për negociatat e Shqipërisë, ku të pranishëm ishin ambasadorja e BE Romana Vlahutin dhe eurodeputeti Knut Fleckenstein.
Të dy njëzëri Vlahutin e Fleckenstein ftuan opozitën që të bashkëpunojë me qeverinë për të përgatitur Shqipërinë për testin final me BE-në në qershorin 2019. Kaq mjaftoi që në media ti jepej zë mesazhit se BE-ja po kërkonte një 18 maj të dytë në vendin tonë, ashtu sicc ndodhi para zgjedhjeve vitin e kaluar.
“Opozita të shtrijë dorën për një lloj dialogu, pasi pa të është një proces i vështirë thuajse i pamundur. Duhet bashkim”, tha ambasadorja Vlahutin.
Pavarësisht se ka vonuar pak orë, përgjigja për ta ka ardhur nga vetë kreu i PD-së, Lulzim Basha, i cili gjatë bashkëbisedimit me disa të rinj në selinë blu tha se të huajt çuditërisht nuk po flasin për problemin real të Shqipërisë dhe thirrjet për “puthje” nga ana e tyre nuk vlejnë.
“Më vjen shumë keq që edhe sot ka pasur një investim donkishotesk edhe nga nga ndonjë i huaj që flet për çdo gjë përveçse për problemin. Problemi këtu nuk është komunikimi opozitë-qeveri, nuk është përballja opozitë-qeveri, problemi është lidhja e qeverisë me krimin, problemi është kapja e drejtësisë nga qeveria, problemi është ekonomia. Nuk ka investime, taksat rriten. Këto janë problemet e Shqipërisë, të tjerat janë për tu hedhur hi syve, për të bërë alibitë e Edi Ramës”, tha Basha – duke i kthyer në këtë mënyrë përgjigje Fleckenstein.
Por qartë e prerë, Basha vazhdoi edhe më tej duke theksuar se nuk pranon leksione për bashkëpunim dhe puthje. Sipas tij PD e ka thënë gjithmonë se nuk bashkëpunon me qeverinë e krimit dhe drogës, pasi largimi i Ramës është e vetmja mënyrë, që Europa t’i hap dyert Shqipërisë.
“Ata që bëjnë leksione, jo bashkëpunimi, jo puthuni. Janë out fare, ju ka mbaruar koha. Partia Demokratike nuk bashkëpunon me qeverinë e krimit dhe drogës. PD e ka bërë punën e saj për hapjen e negociatave, duke parë të vërtetat në sy, duke ju thënë europianëve kështu është siç thoni ju, por pikërisht se është kështu na duhet ndihma juaj dhe hapja e negociatave do të ishte një ndihmë shtesë për ti mbajtur përgjegjës”, nënvizoi Basha.
(E.K/FAXWEB.AL)
Discussion about this post