Prej disa ditësh ka nisur një debat publik mes Olti Currit dhe moderatores Alketa Vejsiu në lidhje me deklaratën e tij për “taramelen” e emisionit “Në Kurthin e Piter Panit”.
Olti Curri u shpreh se produksioni nuk duhet ta shndërrojë vogëlushin e shkathët Xheison Bafti në “lypës”, duke kërkuar mbledhjen e parave për ta ndihmuar familjen e tij. Alketa Vejsiu tha në emisionin që prezanton që qëllimi i saj i vetëm ishte të ndihmonte familjen e Xhejzonit.
I pyetur live nga fansat në rrjetet sociale “A do të pajtohesh me Alketën?” Olti Curri tha:
“I pajtuar jam me Alketën, s’kam asnjë gjë unë me Alketën personalisht. Thjesht duke ditur eksperiencën e VIP-ave në ‘Dance Wth Me’, që shumë prej tyre janë ankuar që nuk kanë marrë paret, dhe duke marrë rastin e Xheisonit që është shumë i talentuar, unë mendova që ky çuni të marrë rrogën more vëlla.” tha Olti Curri.
Olti u shpreh se Xheisonit i takon të paguhet ashtu siç paguhen personazhe të njohur televizive që shfaqen në produksione të ngjashme më “Në Kurthin e Piter Panit”.
“Të marrë rrogën siç merr Valbona Selimllari, Kledi Kadiu, Albi Nako të gjithë këta që kanë pasur produksione të ngjashme aty, Robert Aliaj që nuk shkon falas, edhe Xheison të ketë rrogën e vet. Përveç se i takon rrogë si çdo fëmije, është më i spikatur se të tjerët dhe i takon dyfish rrogë”. tha më tej ai.
Olti Curri shtoi se pavarësisht se është shumë i veçantë, Xheison ka një defekt në të folur që kërkon ndihmën e mjekut profesional.
“Ai kërkon lokoped për të rregulluar të folurën. Ai ka siklet kur flet ashtu, megjithatë këtu shfrytëzohet për humor” tha Olti për fansat.
