‘’Do të arrij tre mandate në qarkun e Shkodrës dhe mbështetja ime është për kryministrin Rama”, kështu deklaronte dje Tom Doshi.
Mirëpo kjo nuk e ka ndalur Ditmir Bushatin kryesuesin e Listës së PS-së në Shkodër që në një takim lokal atje të sulmonte deputetin e PS-së Doshi, i cili në këto zgjedhje garon nën siglën e PSD-së.
Duke ironizuar me padinë për fshehje të pasurisë nga ana e Doshit, Bushati thotë se Shkodra nuk ka nevojë për bamirës.
“Me datën 25 ka vetëm një zgjedhje për ne dhe ky është Edi Rama me Partinë Socialiste, numrin dy. Ne nuk kemi nevojë as për mik, as për kandidatë të tjerë që dalin lart e poshtë nëpër televizion që thotë na i jepni votat ne, se edhe ne do të mbështesim Edi Ramën.
Por po të ishte puna kështu nuk do të ishim në parti të ndryshme, do të ishim të gjithë në të njëjtën parti. Nuk kemi nevojë as për me dëgju parti të tjera që vijnë me forma të tjera me penetru, edhe këtu, ne kemi parë në fund të ditës së çfarë kanë bërë.
Bamirësit janë në fondacione bamirësie, kishat dhe xhamitë i ndërtojnë institucionet fetare. Unë kam përshtypjet se kjo zonë ka të drejtë për të zgjedhurit e tyre” ka thënë Bushati në Vaun e Dejës. (E.K/SHUPLAKA)
