Këtë paradite pritej reagimi zyrtar i Partisë Demokratike pas zbardhjes së votimit lidhur me amendamentin Vasili, për çështjen që nga periferike u kthye në thelb për atë që po ndodh në politikën shqiptare. Lulzim Basha me grupin e tij parlamentar është pro apo kundër qeverisë Rama dhe koncesioneve?! Kjo është pyetja që sot selia e PD-së duhet t’i ishte përgjigjur mirë, për të sqaruar qytetarët për aktin që kreu në Parlament.
Por me sa duket gjithçka u mbyll me deklaratën legjitime të deputetes Albana Vokshi, e cila ka votuar pro Amendamentit për bllokimin e koncesionit dhe me një tjetër deklaratë të fortë që meriton vëmendje.
RENDITJA KRONOLOGJIKE E FAKTEVE
1.Petrit Vasili propozon amendamentin për bllokimin e koncesionit të Laboratorëve.
2.Amendamenti nuk miratohet dhe merr pro vetëm 39 vota, kundrejt 63 të tjerave kundër.
3.Zbardhet mënyra se si kanë votuar deputetët, ku surpriza rezulton mungesa e 21 deputetëve demokratë, 2 të LSI-së, votat abstenim të Ilir Metës e Edi Ramës, mungesa në votim e 7 deputetëve të tjerë dhe 4 socialistë.
4.Partia Demokratike shpjegohet plot 2 ditë pas votimit, vetëm kur votimi bëhet publik nga ”Shuplaka” se pse nuk votuan kundër koncesionit dhe këtë e bën me dy deklarata kontradiktore: Deklaratën e Albana Vokshit që dënon koncesionin dhe deklaratën e dytë ku sulmon Lëvizjen Socialiste për Integrim.
ANALIZA E THJESHTË E VOTIMIT
Dy fakte u vunë re dje gjatë votimit: Emrat e deputetëve që munguan për të mos mbështetur Petrit Vasilin janë ish-kryeministri dhe deputetët rebelë të lidershipit të ri të PD-së si Majlinda Bregu, Astrit Patozi, Ridvan Bode etj dhe një fakt tjetër shumë i rëndësishëm është edhe akti i deputetëve rebelë të PS-së, tashme me partinë e tyre Ben Blushit dhe Mimoza Hafizit, që deri dje kundërshtonin fuqishëm Ramën, por që me mungesën e tyre i bënë një shërbim të madh.
Po a mund të kishin bërë shumicën për ta bllokuar koncesionin e laboratorëve LSI-ja dhe PD-ja? Nëse Partia Demokratike do të kishte vendosur të mbështeste nismën e LSI-së, rezultatet do të ishin këto:
-Pro Amendamentit Vasili votuan 20 deputetë të Partisë Demokratike dhe 14 të LSI-së. Në total 34. Atyre iu bashkuan, Vangjel Dule i PBDNJ-së, 2 të Partisë Republikane dhe 2 të PDIU-së. Pra në total 39. Por nëse do u ishin bashkuar edhe 21 deputetë të tjerë të PD-së, shifra do shkontë në 60.
-Nëse këtyre 60 do t’u bashkohej Ilir Meta që votoi abstenim dhe dy deputetë të LSI-së që munguan Monika Kryemadhi dhe Vangjel Tavo, totali do kishte shkuar 63.
-Por po të shihet me vëmendje, është edhe një grupim tjetër që munguan: Ben Blushi dhe Mimoza Hafizi, dy kundërshtarët e fortë të Ramës dhe 5 të tjerë: Gjovalin Bzhetaj, Agron Duka, Florjan Mima, Fatmir Mediu të Partisë Republikane si dhe Nard Ndoka i Demokristianëve. Në total nëse këtyre 63 do t’u ishte bashkuar grupi i të shtatëve, shifra do të shkonte 70.
-Po kështu, nëse Spartak Braho do kishte votuar Amendamentin Vasili, shifra do shkonte 71. Për maxhorancën, nëse Rama do votonte kundër amendamentit, por do votonte ndryshe Braho, sërish numri do ishte 63.
-A do mbetej në raportin 63 me 71? Jo. Sepse maxhorancës i munguan edhe 4 deputetë të saj. Pra raporti final do të kishte qenë 67 me 71. Pra në total 138 deputetë, me 2 deputetë që nuk ishin fare prezentë (Parid Cara dhe Armando Prenga).
MARRËDHËNIA PD-LSI DHE NJË DEKLARATË
Sot demokratët kanë bërë një deklaratë shumë të fortë duke treguar qartë se nuk kanë dashur të bëhen vegël e LSI-së. Po çfarë deklarojnë ata konkretisht? Sipas tyre amendamenti i Vasilit nuk kishte asnjë vlerë ligjore. Dhe në këtë rast pyetja do qe e thjeshtë: Nëse është e vërtetë që s’ka vlerë ligjore pse një pjesë e deputetëve të saj morën pjesë në votim?
”Vendimin për konçesionin e laboratorëve e merr qeveria dhe jo Kuvendi. Nëse Ilir Meta është kundër konçesionit e ka të thjeshtë: ta rrëzojë atë në qeveri. Le të bllokojë qeverinë ose të dalë nga qeveria. Por këtë LSI nuk e bën dot, sepse qeverisja është oksigjeni që mban në jetë LSI-në.
Po afrohen zgjedhjet dhe është koha kur Ilir Meta bën sikur nuk ka qenë në qeveri katër vjet. LSI është bashkëautore e të gjitha vjedhjeve, konçesioneve dhe abuzimeve të qeverisë Rama-Meta, nga një pjesë e të cilave LSI ka përfituar direkt.Nëse Ilir Meta është për interesin publik, nuk do kishte bërë pazar me taksën e gazit. Nëse Ilir Meta është për interesin publik, le të ngrejë zërin kundër koncesionit të dializës që u shit për dy lekë tek klientët e LSI-së.”, vazhdon më tej me deklaratën e saj Partia Demokratike.
Për Partinë Demokratike a duhet të ketë përparësi interesi i publikut dhe kauza kundër koncesioneve apo lufta ndaj LSI-së?!
Se siç e thotë në deklaratën e saj, nëse ”kjo është opozita”, me siguri zëri i interesit publik do të duhej të përfaqësohej me blindimin e votave kundër koncesionit që siç Basha e thotë përditë pasuron oligarkët./Valmora Gogo-SHUPLAKA
[ngg_images source=”galleries” container_ids=”152″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
