Vendimi i Ramës për të hequr katër nga ministrat e qeverisë së tij nuk është pritur dhe aq mirë. Më shumë sesa për shkarkimet, publiku dhe qytetarët janë shprehur të habitur me arsyen që dha Rama për shkarkimet ‘’Ministrat do shpërndahen për fushatë që qarqet që drejtojnë’’. Në fakt kjo është marrë si një justifikim i kryeministrit për të shmangur dështimet e mëtejshme në këto Ministri.
Madje Rama quhet me ironi nga gazetari Sokol Shameti edhe si kryetar i Këshillit të Zëvendës Ministrave. Ai ka vijuar duke ironizuar edhe me Ministrat e shkarkuar duke thënë se ‘’ ka lezet të lihet të shkojë dëm duke u marrë me qeverisje, gjithë ajo energji që rrezaton Blend Klosi me Lir Beqën dhe Blend Çuçin’’.
SHKRIMI I PLOTË I SOKOL SHAMETIT:
Mirë e ka kryetari i Këshillit të Zëvendësministrave kur thotë se ndryshimet në qeveri po i bën për t’i dhënë energji PS-së për zgjedhje.
Dhe vërtet: a ka lezet të lihet të shkojë dëm duke u marrë me qeverisje, gjithë ajo energji që rrezaton Blend Klosi me Lir Beqën dhe Blend Çuçin?
A mund të shpërdorohet një “kampion” si Saja duke u lënë në një zgëq si Ministria e Brendshme?
Bën sens shokë, bën shumë sens!
Një qeveri kaq e suksesshme sa kjo që thotë se ka Rama, mjafton të qeverisë dhe i fiton zgjedhjet pa pasur nevojë për t’i dërguar zyrtarët t’u mbushin mendjen njerëzve se kanë qeverisur mirë.
Mirëpo nevoja e qeverisë për të dërguar në bazë kanaçe me energjizues në trajtë ish-ministrash, është prova më e dukshme se jo vetëm karvani s’ka shkuar përpara, por karvan as që ka pasur fare. (E.K/SHUPLAKA)
