Prokuroria e Posaçme Kundër Krimit të Organizuar dhe Korrupsionit i ka kthyer përgjigje presidentit Meta, ku thotë se asnjë nga kandidatët për ministra në qeverinë ‘Rama 3’ nuk është nën hetim nga ana e tyre.
Presidenti Meta, i cili është në pritje të dekretimit të ministrave të qeverisë ‘Rama 3’ kërkoi informacion nga SPAK dhe nga Prokuroria e Përgjithshme nëse ndonjëri prej të propozuarve ishte nën hetim prej tyre.
Duket se asnjë nga ministrat e propozuar nga Rama nuk janë subjekt i hetimit të prokurorive.
“Asnjë prej emrave të paraqitur nuk është i regjistruar si person nën hetim në regjistrin e njoftimit të veprave penale të Prokurorisë së Posaçme”, mësohet të jetë shprehur Kraja në letrën që i ka mbërritur presidentit.
Njëjtë si SPAK u shpreh gjatë ditës së djeshme dhe Prokuroria e Përgjithshme, ku tha se asnjë nga ministrat nuk janë të proceduar apo nën hetim.
Ishte presidenti Meta ai që kërkoi informacion për 17 anëtarët e kabinetit të ri qeveritar, ndërsa i duhet të shprehet me dekret për secilin prej ministrave të propozuar nga Rama. Tashmë që ata dalin të pastër, të paktën sipas prokurorive, Meta duket se do të shkojë drejt dekretimit të secilit prej tyre, duke tentuar të shmangë dhe një përplasje të re institucionale.
Presidenti dekretoi më herët Edi Ramën si kryeministër, duke u mbështetur në ligjin që e drejta për formimin e qeverisë i jepet partisë që ka fituar shumicën në zgjedhje.
Tashmë pritet që në Kuvend të bëhet dhe votimi i qeverisë së re, duke i hapur rrugë dhe nisjes së punës, që derimë tani mbetet pa program.
Edi Rama i cili fitoi mandatin e tretë qeverisës, nuk ka bërë ende publik programin që do të mbështetet për të drejtuar vendin në 4 vitet e ardhshme.
(E.K/Faxweb.al)
