Kreu i grupit Parlamentar të PS-së Taulant Balla ka komentuar vendimin e dhënë nga KPA për shkarkimin e Besnik Muçit, pavarësisht se ai është tashmë anëtar i Gjykatës Kushtetuese.
“Së pari asnjë përfaqësues i ps nuk ka komentuar dhe nuk do komentojë vendimet e KPK dhe KPA, janë të autoriteteve kushtetuese të cilat tashmë nuk kanë asnjë lloj ndikimi dhe atakimi politik.
Politika mjaft ka mbajtur peng deri në draftingun e reformës në drejtësi dhe politikanët duhet të heshtin sa herë që institucionet pastrojnë drejtësinë nga elementët që nuk kanë besimin te publike dhe sa herë që faktojnë që kanë lidhje me botën kriminale
Nuk ka më që të jesh anëtar i Gjykatës Kushtetuese pasi je shkarkuar nga Vetingu, kjo do ta bënte antikushtetuese. Kjo është çështje që u takon institucioneve. Qytetarët e kanë mbështetur gjithmonë reformën në drejtësi dhe çdo përpjekje për ta penguar atë, qoftë dhe nga presidenti, do të përballet me ligjin”, u shpreh Balla para gazetarëve.
Pavarësisht se Kolegji i Posatshëm i Apelimit vendosi shkarkimin e tij si prokuror, dhe përjashtimin me 15 vite nga sistemi i drejtësisë, Besnik Muçi, anëtari i Gjykatës Kushtetuese i sfidoi hapur këto organe, duke u kthyer sot në zyrën e tij në Gjykatën Kushtetuese.
Muçi e tha qartë se KPA nuk ka rol vendimarrës mbi një anëtar që është betuar te presidenti dhe ka nisur punën në Gjykatën Kushtetuese. Ndërkohë që procesin ndaj tij e quajti politik, ndërsa një nga më mëkatet më të mëdha të kryera ndaj tij, cilësoi atë të presidenit Meta që e emëroi në Gjykatën Kushtetuese.
Presidenca ka reaguar lidhur me vendimin e dhënë nga KPA, për të shkarkuar Besnik Muçin.
“ZERO SURPRIZË nga vettingu i Partisë. Pas dështimit të rrëmbimit flagrant të Gjykatës Kushtetuese, rikthehet skenari për bllokimin e këtij institucioni nga të njëjtët aktorë që e bllokuan për tre vjet. TURP! TURP! TURP!”
Kolegji i Posatshëm i Apelimit ka marrë vendimin për Besnik Muçin, duke e shkarkuar atë nga detyra, që më herët ishte dekretuar nga ana e presidentit Meta si anëtar për Gjykatën Kushtetuese.
Muçi ka qenë i pranishëm sot në seancë, ku është njohur me vendimin e dhënë nga KPA, pas ankimimit të bërë nga ana e Komisionerit Publik.
Ish-prokurori i Krimeve të Rënda e kishte kaluar Vetingun në shkallën e parë, po ky vendim i sotëm duket se e komplikon edhe më shumë situatën në Gjykatën Kushtetuese.
“KP pretendon se në lidhje me figurën, fakti që ka qenë i përfshirë me persona që kanë disponuar armë zjarri, dhe blerjen e apartamentit, favoret për pagesën e tij, dhe deklarimet e pavërteta të Muçit, dhe për këtë duhet shkarkuar. Sipas trupit gjykues, subjekti ka prishur besimin e publikut. Këto mjaftojnë të konsiderohet se Muçi nuk mund të gëzoj besimin e Muçit për të qëndruar në detyrë”, tha KPA në vendimin e dhënë për Muçin.
Nuk dihet tashmë se cili do të jetë interpretimi ligjor për Muçin, dhe nëse ai do të vijojë të qendrojë si gjyqtar i Kushtetueses, pavarësisht se u shkarkua si prokuror, që detyrimisht e përjashton për 15 vite nga sistemi i drejtësisë.
(E.K/Faxweb.al)
