Presidenti Ilir Meta në konferencën që pati me gazetarët mëngjesin e sotëm, i quajti imagjinare zgjedhjet e 30 Qershorit që sipas tij janë partiake, dhe mund t’i shërbejnë vetëm organizatës socialiste.
I pyetur nga gazetarët nëse do të ishte më e ndershme që të jepte dorëheqjen, Meta tha se institucioni i presidentit nuk është personal i tij, dhe ai do të qëndrojë në detyrë, aq sa e ka parashikuar Kushtetuta, pra edhe për 3 vitet e ardhshme.
Po ashtu Meta u pyet dhe për mundësinë e shpërndarjes së Kuvendit, teksa tha se institucioni që ai drejton do të jetë gjithnjë në shërbim të Republikës.
A nuk do të ishte më e ndershme që të jepnin dorëheqjen, sa kohë që i quani zgjedhjet farsë?
Ky institucion nuk është i Ilir Metës, është i Republikës, nga ky institucion do të nisë dhe ringritja e Republikës, bashkë do të jemi këtu deri në 22 Korrik të vitit 2022.
A po merr në konsideratë presidenti shpërndarjen e Kuvendit?
Presidenti do ti shërbejë gjithmonë mbrojtjes së Republikës, dhe shpresoj që këtë ta bëjnë të gjithë institucionet e tjera.
A ka presidenti një plan B? A do të ndërmerrni hapa të tjera në kuadër të dialogut?
Unë mbetem besimplotë se do të ketë reflektim nga të gjitha palët, do të vijoj të jem i qetë dhe i duruar, Presidenti nuk ndëhyn për të penguar zgjedhje partiake, po padyshim që kjo datë ka rënë, nuk ekziston më. Kush do të bëjë zgjedhje partiake është i lirë që ta bëjë. Në Republikën e Shqipërisë ka vetëm një institucion që e vendos datën e zgjedhjeve.
Çfarë mendoni për qëndrimin që kanë mbajtur ambasadorët për zgjidhjen e krizës politike?
Unë nuk hyj te politikanët që flasin në emër të ndërkombëtarëve, dhe as fshihem pas tyre. Unë nuk kam anuluar zgjedhjet në Itali, mos prisni që asnjë ambasador që të thojë këtë që po them unë, edhe sikur zgjedhjet imagjinare të bëhen në 30 Qershor, dhe populli opozitar të dalë në rrugë, fati i negociatave të Shqipërisë futet në një rrugë pa kthim.
(E.K/Faxweb.al)
