I pyetur nëse i trembet një lufte civile në 30 Qershor, sa kohë që opozita thotë se do t’i bllokojë zgjedhjet, kryeministri Edi Rama u shpreh se deri në atë datë ka ende kohë.
Rama tha se deri në datën e mbajtjes së zgjedhjeve do të ketë zhvillime të tjera, dhe se askush nuk do të lejojë një vend anëtar të NATO-s që të shkojë drejt destabilizimit.
Sipas kryeministrit deklaratat e forta të bëra nga ndërkombëtarët janë vetëm fillimi, se se zgjedhjet do të mbahen në respekt të Kushtetutës.
“Dëgjoni 30 Qershori është shumë afër, por edhe shumë larg, është afër në kohën kalendarike, po koha politike deri në 30 Qershor është shumë e gjatë. Shumë nga deklaratat që dëgjoni sot, në 30 Qershor nuk do ti dëgjoni më. Deklaratat e djeshme kanë qenë shumë domethënëse, dhe nuk janë fundi, po është fillimi.
Të kërcënosh me destabilitet një vend anëtar të NATO-s është kuturisje e kot. Një udhëheqës nuk mund të sillet dot si udhëhumur. S’kam asnjë shqetësim lidhur me 30 Qershorin, do bëjmë çmos që të informojmë qytetarët. Unë kam besim që gjërat do të shkojnë duke u normalizuar, dhe uroj që të normalizohen me hir dhe jo me pahir. Nuk mund ta marrësh peng një vend anëtar të NATO-s”, u shpreh Rama.
(E.K/FAXWEB.AL)
