Të tjera detaje kanë dalë në dritë nga rrëzimi i avionit ukrainas Boeing-737 në Iran, ku janë shënuar më shumë se 170 viktima, nga shtatë vende të ndryshme të botës, që kanë qenë në bordin e tij.
Gjysmëhëna e Kuqe e Iranit tha se nuk kishte shanse për të gjetur të mbijetuar në rrënojat e avionit të gjetur, ndërsa derimë tani të gjitha informacionet thonë se ngjarja ka ndodhur për shkak të një defekti në motor.
Ngjarja ndodhi pak orë pas sulmeve me raketa që kreu Irani në drejtim të bazave ajrore amerikane në Irak, por të gjitha mediat e përjashtojnë mundësinë e një sulmi terrorist mbi avionin.
Një gjë e tillë u konfirmua dhe nga Ambasada e Ukrainës në Teheran, ku u tha se defekti i motorit shkaktoi përplasjen dhe nuk kishte asnjë lidhje me terrorizmin.
“Sipas informacionit paraprak, avioni u rrëzua si rezultat i një defekti të motorit për arsye teknike. Aktualisht, versioni i një sulmi terrorist është përjashtuar”, tha ambasada në faqen e Ministrisë së Jashtme të Ukrainës.
Midis viktimave ishin 82 iranianë, 63 kanadezë, 11 ukrainas përfshirë të gjithë ekuipazhin, 10 suedezë, katër afganë, tre britanikë dhe tre gjermanë, tha Ministri i Jashtëm Vadym Prystaiko.
Presidenti i Ukrainës Volodymyr Zelensky tha se po linte në gjysmë një udhëtim në Oman dhe po fluturonte përsëri në Kiev. Ai paralajmëroi se duhet të ndaleshin spekulimet për katastrofën, derisa raportet zyrtare të dilnin në një konkluzion final.
“Ngushëllimet e mia të sinqerta për të afërmit dhe miqtë e të gjithë pasagjerëve dhe ekuipazhit,” tha Zelensky në një deklaratë.
Rreth 168 pasagjerë dhe nëntë anëtarë të ekuipazhit u konfirmuan se ishin regjistruar për të fluturuar në aeroplan.
Ukraina International Airlines ka pezulluar fluturimet për në Teheran deri në një afat të pacaktuar. Linja ajrore tha që avioni kishte pasur mirëmbajtjen e fundit të planifikuar të hënën.
(E.K/Faxweb.al)
Discussion about this post