Pas deklaratave të kryeministrit serb Aleksandar Vuçiç, që Edi Rama nuk ka dashur të vizitonte selinë e Aleancës për Ardhmërinë e Kosovës, kjo e fundit reagon përmes një njoftimi për shtyp.
Sipas partisë së ish-kryeministrit Ramush Haradinajt, “qyfyret” e kryeministrit të Serbisë, Aleksandar Vuçiç nuk kanë të ndalur.
“Qeveria e Serbisë, lëre më që trillon akuza kundër figurave politike në Kosovë, në kohën kur i bëjnë 100 marifete për të asgjësuar dëshmitë e krimeve të politikanëve serbë kundër shqiptarëve, por i japin të drejt vetës që të bëjnë shpifjet më ordinere për Kosovën dhe për AAK-në, si parti politike”, shkruhet në njoftimin për shtyp.
Ndërkohë, AAK ia kujton Vuçiç-it se partia është e regjistruar në Kosovë e jo në Serbi. Ndërkohë lidhur me deklaratat për Ramën shkruan: “Kosova po ashtu është shtet i pavarur dhe nuk e ka ndërmend ta pyes Aleksandër Vuçiqin, se kur dhe si do ta pres kryeministrin e një shteti sovran, siç është edhe kryeministri shqiptar, Edi Rama”.
Më pas, në njoftim AAK shton se Vuçiç duhet t’i hetojë 110 zyrtarët serbë se si asgjësuan dëshmitë për krime lufte në Kosovë, e të mos merret me AAK’në e me Kosovën, “sepse shpija ka zot”. (D.D/Shuplaka)
