Prej ditësh me radhë, Tirana po përballet me mungesën e ujit të pijshëm ndërsa bashkia ka dërguar Task-forcën në terren për të ndërprerë energjinë elektrike.
Mirëpo sipas nënkryetarit të bashkisë Arbian Mazniku,ndërhyrja mund të ishte bërë edhe më shpejt, por njerëzit vazhdojnë me rilidhjet.
I ftuar në emisionin “Ekopolitikë” të gazetares Aurora Sulçe, Mazniku tha se po diskutohet me qeverinë qëndrore për të futur në kodin penal ndërhyrjen në linjat e ujit të pijshëm, në mënyrë që qytetarët të ndërgjegjësohen dhe të ndalojnë me lidhjet e parregullta.
“Mund të ishte ndërhyrë më shpejt. Por sa herë ndërhyhet ka kundërndërhyrje nga ana e njerëzve që i rilidhin lidhjet. Ndërhyrja në linjat e ujit nuk konsiderohet një vepër penale dhe pavarësisht një morie shkresash që kemi çuar në prokurori për ndjekje penale të njerëzve me përjashtim të gjobave të vogla që Ujësjellësi mund të vendosë, këto njerëz kalojnë pa u dënuar nga Prokuroria dhe policia. Kemi pasur një betejë me kundravajtësit. Ne i ndërpresim lidhjet, pas 2-3 ditësh rilidhen sërish. Po e diskutojmë me qeverinë qëndrore këtë gjë dhe për ta futur në kodin penal.”, tha Mazniku. (D.D/Shuplaka)
