Abuzoi me fondet, arrestohet ish-nënkryetari i bashkisë së Librazhdit Andri Çota

Ish-nënkryetari i bashkisë së Librazhdit Andri Çota, i akuzuar për shpërdorim detyre është vënë në pranga nga policia.

Ish zyrtari i lartë akuzohet se e ka trajtuar si pronë private ekipin “Sopoti” dhe fondet që ka dhënë  Bashkia.

Mësohet se ka qënë një denoncim i kryer në polici nga sekretari i përgjithshëm në bashki, shtetasi B.P që ka vënë në lëvizje policinë e Librazhdit dhe Elbasanit .

Shtetasi B.P ka deklaruar në polici se Z.Çota administron një faqe në facebook të cilin sipas tij e përdor për qëllime dashakeqe ,duke kaluar në ofendine dhe sharje personale. Kaq ka mjaftuar që togat blu të nisin një hetim të mirëfilltë dhe të zbulojnë disa nga shkeljet e ish zyrtarit të lartë.

Njoftimi i policise:

DVP Elbasan/Finalizohet operacioni policor i koduar “Loading”, pas 1 muaji hetime me metoda proaktive.

Kapet dhe vihet në pranga një shtetas i shpallur në kërkim, i akuzuar për shpërdorim detyre.

Në vijim të punës operacionale hetimore, bazuar në informacionet e siguruara nga inteligjenca policore, për një rast të shpërdorimit të detyres, strukturat për Hetimin e Krimeve Ekonomike dhe Financiare të DVP Elbasan, pas një muaji hetime me metoda proaktive, në drejtimin e Prokurorisë së Elbasanit, kanë finalizuar operacionin policor të koduar “Loading”.

Si rezultat, është kapur dhe ndaluar shtetasi A. Ç., 37 vjeç, banues në Librazhd.

Për këtë shtetas, Gjykata e Shkallës së Parë e Juridiksionit të Përgjithshëm Elbasan, më datë 21.09.2023, ka caktuar masën e sigurisë “Arrest në burg”, pasi dyshohet se gjatë kohës që ka mbajtur postin nënkryetar i bashkisë Librazhd, ka keqpërdorur fondin për klubin sportiv, duke shkaktuar dëm ekonomik.

Vijojnë hetimet për dokumentimin e plotë të këtij rasti.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.