Voltana Ademi është një nga kryebashkiaket e vendit më të sulmuara nga ana e socialistëve në pushtet. Qeveria dhe pushteti lokal nuk janë marrë vesh për shumë nga çështjet që kanë të bëjnë me investimet në qytetin e Shkodrës. E madje nuk kanë kursyer as polemikat.
Pak javë më parë në një takim në Shkodër Rama shprehej se Ura e Bunës ishte lënë në mëshirë të fatit. Po nuk vonoi përgjigja e kryebashkiakes që i kujtonte Ramës që ura ishte në pronësi të Ministrisë së Mbrojtjes.
Sërish sot Ademi i është rikthyer këtij propozimi, pasi tashmë sipas saj del se qenka Ministria e kulturës që ka përgjegjësi për rindërtimin e kësaj ure.
‘’Z. Kryeministër, Bashkia e Shkodrës nuk kishte as informacion dhe as ftesë për fillimin e punimeve në urën e Bunës. Ne nuk refuzojmë, por përkundrazi, kemi kërkuar dhe do të kërkojmë deri në fund që banorët e Shkodrës të përfitojnë atë që i takon.
Bashkia e Shkodrës i bëri ftesë Ministrisë së Mbrotjes në pronësinë e së cilës është dhe ura e Bunës, që të bashkëpunonim për ta bërë. Madje ofruam dhe mundësitë tona financiare dhe projekt-idenē per restaurimin e plotë. Por nuk deshët, sepse ju duhej të bënit fotot për fushatë se kujtuat se është pronë e Bashkisë.
Sot na i doli për pronar, Ministria e Kultures! Zv ministri u shpreh se është monument kulture dhe kemi bërë disa riparime!!
Ura e Bunës ka nevojë për një projekt të plotë ndërhyerje dhe jo makiazhin e spektaklin e rradhës!! Prandaj, që kjo të mos ndodhë, duhet që të bëni publik projektin dhe financimin që po realizohet, e në respekt të ligjit të jepet edhe leja zyrtare për realizimin e këtyre punimeve…’’, shkruan Ademi. (E.K/SHUPLAKA)
