Drejtorja e Departamentit të Administratës Publike, Albana Koçiu, ka deklaruar sot në një konferencë për mediat lidhur me përfshirjen ose jo të punonjësve të administratës në fushatat elektorale.
Ajo deklaroi se çdo punonjës e ka të ndaluar të përfshihet në fushatë brenda perimetrit të institucionit dhe gjatë orarit të punës. Në rast shkelje do të ketë sanksione ndaj këtyre personave.
“Ndalohet kategorikisht përdorimi i mjeteve, fondeve materiale të ndryshme pronë e administratës publike si dhe burimeve njerëzore të institucioneve të administratës publike të çdo niveli. Përcaktohet qartë ndalimi i fushatës zgjedhore në institucione publike. Ndalimi i përdorimit të detyruar të administraëts së institucionit për veprimtari të fushatës zgjedhore brenda orarit të punës, si dhe i nxënësve të sistemit shkollor parauniversitar brenda orarit mësimor.”, u shpreh gjatë konferencës për shtyp Koçiu.
Drejtorja e DAP-it theksoi se jashtë këtij përcaktimi, punonjësit janë të lirë të mbështesin cilën parti të duan:
“Të drejtat politike për punonjësit e administratës nisin pas orarit zyrtar dhe jashtë perimetrit të institucioneve të administratës. Kushdo ka të drejtë të plotë e të pacënueshme të angazhohet me cilëndo parti politike. Mësuesit janë të lirë, nxënësit janë të lirë por jashtë institucionit dhe orarit zyrtar.”
(XH.A/SHUPLAKA)
Discussion about this post