Nga Klodian Tomorri –
Ne kemi një problem të madh me administratën publike. Ajo nuk po shpenzon dhe duke mos shpenzuar është bërë barrë për ekonominë.
Për gjithë vitin 2016 Kuvendi ka autorizuar sektorin publik të marrë 34 miliardë lekë ose 300 milionë dollarë borxh mbi të ardhurat që shteti mbledh nga taksat dhe burimet e tjera financiare. Por deri në fund të 10-mujorit, administrata jo vetëm që nuk ka konsumuar asnjë lekë huamarrje, por ka shpenzuar 13 miliardë leke më pak se sa të ardhurat që ka mbledhur nga taksat e biznesit dhe individëve.
Shkurt administrata jonë po mban qindra milionë dollarë kapitale financiare peng dhe kjo është shumë e dëmshme për ekonominë.
Nëse shikon numrat vetëm gjysma e shumës së nënshpenzuar vjen nga investimet publike. Pjesa tjetër janë shpenzime korrente, ato që kanë të bëjnë me operacionet e përditshme të sektorit publik.
Administrata jonë nuk shpenzon. I merr lekët biznesit dhe familjeve nëpërmjet taksave dhe nuk ia kthen ekonomisë mbrapsht, por i mban të fjetura në kasafortat e mykura të thesarit. John Maynard Keynes thotë se për çdo lekë që sektori publik nuk shpenzon, dikush mbetet pa punë.
Pasiviteti financiar i sektorit publik është shumë i dëmshëm për ekonominë dhe punësimim. Ekonomia jonë u godit dy vite rresht nga rritja e taksave. Tani që rritja ekonomike ka filluar të gjallërohet, administrata i bëhet sërish barrë.
Nuk bëhet fjalë për të rritur borxhin publik. Ato para që flenë në thesar janë brenda limitit të deficitit që ka autorizuar Kuvendi, ndaj duhet t’i rikthehen ekonomisë sa më parë.
Shpenzoni, shpenzoni, shpenzoni. Ose nese nuk jeni në gjendje ta bëni, kthejuani paratë qytetarëve.
