Sekretari Amerikan i Mbrojtjes, Pete Hegseth, të premten nxori urdhra që kërkojnë që gazetarët të shoqërohen nga zyrtarë të autorizuar brenda pjesës më të madhe të ndërtesës së Pentagonit kufizimi më i fundit nga administrata Trump ndaj shtypit.
Masat, që hyjnë në fuqi menjëherë, ua ndalojnë reporterëve të pajisur me leje hyrjeje të hyjnë në shumicën e hapësirave të selisë së Departamentit të Mbrojtjes në Arlington, Virginia, pa një miratim zyrtar dhe pa shoqërim.
“Ndërsa Departamenti mbetet i përkushtuar ndaj transparencës, ai ka po ashtu detyrimin të mbrojë informacionin e inteligjencës së klasifikuar (CSNI) dhe të dhënat e ndjeshme zbulimi i paautorizuar i të cilave mund të rrezikojë jetën e pjesëtarëve të forcave amerikane,” tha Hegseth në një memorandum.
Ai e quajti mbrojtjen e informacionit të inteligjencës kombëtare të klasifikuar dhe të sigurisë operacionale “një imperativ i palëkundur për Departamentin.”
Shoqata e Shtypit të Pentagonit, një organizatë që përfaqëson interesat e gazetarëve që mbulojnë ushtrinë amerikane, tha se rregullat e reja duket se janë një “sulm i drejtpërdrejtë ndaj lirisë së shtypit.”
“Vendimi pretendohet se bazohet në shqetësime për sigurinë operacionale. Por korrespondentët e Pentagonit kanë pasur qasje në hapësira të paklasifikuara e të pashpallura si të sigurta në Pentagon për dekada, nën administrata republikane dhe demokrate, përfshirë edhe pas sulmeve të 11 shtatorit 2001, pa pasur shqetësime për sigurinë operacionale nga udhëheqësia e Departamentit të Mbrojtjes,” thuhej në deklaratë.
Pentagoni nuk iu përgjigj menjëherë kërkesës së Reuters për koment mbi deklaratën e shoqatës së shtypit.
Që kur Presidenti Donald Trump u rikthye në detyrë në janar, Pentagoni ka nisur një hetim mbi rrjedhjet e informacionit, që ka çuar në pezullimin administrativ të tre zyrtarëve.
Gjithashtu, ka kërkuar që mediat tradicionale, përfshirë New York Times, Washington Post, CNN dhe NBC News, të lirojnë zyrat e tyre në Pentagon, si pjesë e një sistemi të ri rotacioni që ka përfshirë media të tjera, zakonisht më të afërta me administratën Trump, si New York Post, Breitbart, Daily Caller dhe One America News Network. Administrata Trump thotë se ky hap ka për qëllim t’u japë mundësi mediave të tjera të raportojnë si anëtarë rezidentë të shtypit në Pentagon.
Në një kuadër më të gjerë, administrata Trump ka përdorur teste me detektor gënjeshtrash për të hetuar rrjedhjet e informacionit të paklasifikuar, dhe disa zyrtarëve të Departamentit të Sigurisë Kombëtare u është thënë se mund të shkarkohen nga puna nëse refuzojnë t’i nënshtrohen poligrafit, raportoi Reuters të premten. Shtëpia e Bardhë thotë se Trump nuk do të tolerojë rrjedhjet e informacionit në media dhe se punonjësit federalë që bëjnë këtë duhet të mbajnë përgjegjësi.
Urdhri i së premtes nga Hegseth gjithashtu kërkon që anëtarët e shtypit në Pentagon të pranojnë përgjegjësinë për të mbrojtur informacionin e inteligjencës kombëtare dhe të dhënat e ndjeshme, dhe thotë se atyre do t’u lëshohen leje të reja që i identifikojnë më qartë si anëtarë të shtypit.
“Ne gjithashtu presim një njoftim të ardhshëm për masa shtesë sigurie dhe rritje të kontrollit mbi procesin e lëshimit të (lejeve të hyrjes),” thuhej në memorandum.
