Kreu i koalicionit “Shqipëria Bëhet”, Adriatik Lapaj, ka reaguar në rrjete sociale pas rezultateve të zgjedhjeve, duke akuzuar për një fushatë të organizuar kundër tij nga të gjitha anët e spektrit politik.
“Është angazhuar gjithë këneta si e si të mos shkoj unë në Kuvend. Po sa tmerr më keni?! O të mjerë, unë nuk pranoj shantazh e as shitem,” shkruan Lapaj në një status të publikuar në Facebook.
Ai ka akuzuar publikisht Zeqirin, dajon e kandidatit Endri Shabani, si dhe vetë Shabanin, duke u shprehur se nuk do të marrin asnjë mandat, ndërsa thekson se nuk do të ndalet nga askush për të hyrë në Parlament.
“Nëse Endri Shabani do të mbahet mend kështu në jetën publike, mbarë u shkoftë bashkë me dajon,” shprehet ai më tej.
Lapaj thekson se është përballur me presion dhe pengesa nga të gjitha anët, përfshirë liderët kryesorë të politikës dhe të rinjtë me të cilët ai ka bashkëpunuar:
“Jam krenar që u luftova nga çdo anë dhe nuk u ndala! U luftova nga Rama, Saliu dhe këta ‘të rinjtë’, deri dhe te ky që e futa në gji… nga të gjithë.”
Në fund të reagimit të tij, Lapaj e cilëson situatën si një padrejtësi ndaj tij dhe gjithë ekipit të “Shqipëria Bëhet”, ndërsa i lë gjykimin në dorë qytetarëve:
“Ndaj meje dhe krejt ekipit të Lëvizjes Shqipëria Bëhet po konsumohet publikisht PADREJTËSI! Populli do gjykojë.”
