Komisioni i Pavarur i Apelimit ka dhënë vendimin për ish-kryeprokurorin Adriatik Llalla. Ish-kryeprokurori me vendimin e sotëm të KPA-s i ka shpëtuar përfundimisht procesit të Vetingut.
‘’Vullneti i subjektit për tu dorëhequr është i arsyetuar dhe i saktë”, u shpreh relatori i çështjes.
“Me shumicë votash vendosi: ndryshimin e vendimit: ndërprerjen e procesit të rivlerësimit për Adriatik Llallën. Ndalimin e emërimit të tij, gjyqtar, prokuror apo anëtar i KLD-së për një periudhë prej 15 vitesh”, thuhet më tej në vendim.
KPA vendosi po ashtu që për 15 vite Adriatik Llalla nuk ka asnjë të drejtë që të ushtrojë funksion e në sistemin e drejtësisë. Vendimi mund të ndryshohet vetëm në gjykatën europiane të të drejtave të njeriut.
Procesi në KPA për Llallën nisi pas ankesës së komisionerit publik Florian Ballhysa, i cili deklaroi se ish-kryeprokurori megjithëse ka lënë detyrën në dhjetorin e vitit të kaluar, nuk është larguar si magjistrat dhe si i tillë ai duhet të kalojë në filtrat e verifikimit të pasurisë dhe figurës.
“Llalla e gëzon ende statusin e magjistratit për shkak se është ish- kryeprokuror. Ai nuk e ka dhënë dorëheqjen në formën e kërkuar”, tha Ballhysa.
Llalla dha dorëheqjen nga sistemi i drejtësisë fill pas largimit të tij nga posti i kryeprokurorit, dhe zëvendësimin e tij nga Arta Marku.
(E.K/FAXWEB.AL)
Discussion about this post