Kreu i PAA, Agron Duka ka thënë sot se opozita e bashkuar nuk shkon në zgjedhje me këtë qeveri.
Në zgjedhje sipas Dukës, opozita do të shkojë vetëm me një qeveri teknike.
Duka ka theksuar edhe më përpara se kërkesa për qeveri teknike është plotësisht e bazuar dhe një opsion i mundshëm, pasi tashmë nuk ka kohë për ndryshme në Kodin Zgjedhor, i cili duhet të shërbejë si garanci për zgjedhjet me standarde të larta. Ndaj sipas tij, qeveria teknike është e vetmja rrugë efektive.
Protestës së demokratëve i është bashkuar përveç PAA, edhe AK, PBDNJ, PDK etj.
Partia Demokratike jo vetëm që do të bojkotojë zgjedhjet nëse nuk do të krijohet qeveria teknike, por do të përdorë të gjithë mekanizmat e saj demokratike për të penguar zhvillimin e zgjedhjeve të 18 qershorit me Edi Ramën kryeministër.
Lideri i opozitës Lulzim Basha e bëri këtë deklaratë të fortë në një intervistë nga Washingtoni për “Zërin e Amerikës”, në ditën e tretë të qëndrimit të tij në Shtetet e Bashkuara të Amerikës.
Basha tha me garanci të plotë, se opozita shqiptare nuk do të lejojë zhvillimin e zgjedhjeve pa u plotësuar kërkesa e tyre për të krijuar një qeveri teknike që të garantojë zhvillimin e zgjedhjeve të lira dhe të ndershme.
“Nuk do të ketë zgjedhje pa opozitën, nuk do të lejojmë këtë fasadë. Ka mekanizma paqësore për të bllokuar zgjedhjet. Këto mekanizma ne do t’i shpalosim hap pas hapi në varësi të situatës politike. Zgjedhje me krim, me Ramën kryeministër nuk do të ketë. Ju garantoj që zgjedhjet nuk do të zhvillohen. Jemi të gatshëm për të gjitha hapat. Do të ndalim një maskaradë dhe do të japim zgjedhje të lira për shqiptarët. Zgjidhja e vetme është me qeveri teknike”, u përgjigj Basha teksa u pyet në lidhje me deklaratën e kryeministrit Rama se “zgjedhjet do të mbahen me apo pa opozitën”.
Lideri i opozitës Lulzim Basha thotë se ka marrë mbështetjen e plotë nga të gjitha nivelet e administratës Trump, Kongresit dhe senatit, për qeveri teknike.
Basha tha se tashmë të huajt panë realitetin që ekziston në Shqipëri, duke akuzuar qeverinë se ka paguar me paratë e drogës persona që të lobojnë përtej kufijve për një realitet të paqenë me arritje të mazhorancës së majtë. (M.D/ Shuplaka)
