Ministri i Financave Arben Ahmetaj, e ka vlerësuar shpërblimin e fundvitit për pensionistët dhe familjet në nevojë, si një shprehje simbolike të vëmendjes së qeverisë.
Sipas Ahmetajt, shpërblimet e fundvitit për këto kategori të popullsisë janë bërë të mundura për shkak të reformave dhe të rritjes ekonomike.
“Paketa e solidaritetit për festat e fundvitit, është një shprehje simbolike por kuptimplotë e vëmendjes së qeverisë ndaj shtresave më në nevojë. Shpërblim dhe mirënjohje për pensionistët, familjet me ndihmë ekonomike, personat me aftësi të kufizuara, familjet e përmbytura, fermerët e dëmtuar, të cilët më shumë se kushdo, kanë ndjerë peshën e sakrificës së rimëkëmbjes ekonomike dhe reformave të vështira, por pikërisht për këtë arsye, ata më shumë se kushdo janë bërë mbështetje për këtë proces transformues të ekonomisë. Rikthimi i rritjes ekonomike dhe reformat kanë mundësi t’i shpërblejnë qytetarët. Nuk është ende mjaftueshëm, ndaj vitin e ardhshëm hedhim një tjetër hap para me rritjen e pagave dhe pensioneve!”, shkruan Ahmetaj.
Në videon e publikuar nga ministri, thuhet se fondi i vendosur për shpërblimin e pensionistëve është më i madhi në këto 25 vjet, plot 38 milion dollarë.
