Ministri i Financave Arben Ahmetaj, i cili është gjithashtu i deleguari i Kryesisë së Partisë Socialiste në Bashkinë Kavajë dhe Rrogozhinë, ka prezantuar sot kandidatin e PS-së për zgjedhjet për Kryetar Bashkie në Kavajë. Kandidati i PS-së është Klodian Shehi.
Zgjedhjet do të mbahen në datën 7 të muajit të ardhshëm, por pavarësisht se zakonisht mandati zgjat vetëm katër vjet, sipas Ahmetajt, këto zgjedhje janë të rëndësishme për Kavajën e 10 viteve që do të vijnë.
“Këto zgjedhje kanë një specifikë shumë të madhe jo vetëm për Kavajën, por për të gjithë Shqipërinë. Duhet marrë ashtu siç e kemi marrë ne gjithmonë, por edhe më shumë akoma me seriozitet, me këmbëngulje dhe modesti, në mënyrë që këtë rradhë Kavaja të bëhet shembull sërish në të gjithë Shqipërinë”, tha Ahmetaj.
Ai ofroi mbështetjen e tij për Shehin, por kërkoi gjithashtu edhe mbështetjen e qytetarëve.
“Unë dua që ne të shkojmë si qytetarë atë ditë dhe të zgjedhim Kryetarin e Bashkisë së Kavajës, të vazhdojmë projektin e Rilindjes Urbane dhe projektin e reformave që kanë nisur Partia Socialiste dhe Aleanca. Mos harroni që qyteti është duke kaluar një periudhë tranzitore fantastike, nga një qytet-fshat, në një qytet destinacion turistik. Mos harroni që zonat e Kavajës me logjikën e re urbane dhe me logjikën e re të ndërtimit të segmenteve rrugore nacionale, kthehet në destinacion turizmi e gjitha. Ta mbështesim Klodianin që të shpalosi Kavajën e dhjetë viteve që vijnë, Kavajën e gjeneratës tjetër, Kavajën e Shqipërisë që duam”, shprehet ministri socialist. (D.D/Shuplaka)
Discussion about this post