Kreu i Autoritetit të Aviacionit Civil Krislen Kerri ka dhënë sot një prononcim për mediat, lidhur me nisjen e fluturimeve të Air Albania. Kerri u shpreh se Air Albania ka përfunduar procesin e certifikimit, ndërsa ende nuk dha një datë konkrete për nisjen e fluturimeve.
Mësohet se fluturimet e para të Air Albania do të nisin nga aeroporti i ri i Stambollit, në gjysmën e muajit Prill, po pa një datë konkrete.
Sipas kreut të AAC-së tre destinacionet e para do të jenë Bolonja, Milani dhe Roma, ndërsa më pas do të synohet edhe Londra.
Kerri pranoi se në vendin tonë mungojnë ekspertët për certifikimin e kompanive ajrore, dhe për këtë proces është marrë ndihmë nga Italia dhe nga vende të tjera partnere.
“Ne jemi informuar nga Kompania së fundi se fluturimet do të nisin nga aeroporti i ri i Stambollit, në ditët ose javët e ardhshme. Air Albania do të atashohet në Turkish Airlines.
Nuk ka një datë fikse, rreth mesit të muajit Prill. Të gjitha pagesat e regjistrimit janë bërë nga kompania Air Albania.
Nuk është turp që të kërkosh ekspertë të huaj, sa kohë që nuk kemi në vendin tonë, ne jemi në partneritet me Italinë dhe me vendet e tjera europiane. Destinacionet kryesore do të jenë Bolonja, Milano dhe Roma, dhe më pas do të synohet dhe Londra.
Çmimet do të jenë shumë më të lira, po për momentin çështja është shumë më shumë teknike dhe nuk mund të japim shifra”, u shpreh Kerri.
Kujtojmë se fluturimet për Air Albania është thënë se do të nsinin që prej muajit Nëntor të 2018-tës, dhe janë shtyrë me disa herë. Ato u reklamuan me të madhe se do të nisnin, edhe me udhëtimet test të kryera nga ana e kryeministrit Rama me studentë apo pensionistë.
(E.K/FAXWEB.AL)
Discussion about this post