“Ajo krijoi zhanrin ‘Nexhmije Pagarusha’ të paarritshëm për askënd”, flasin Inva Mula dhe Irma Libohova: Shkruajti epokën e saj, ëndrrat e parealizuara

Ndarja nga jeta e Nexhmije Pagarushës ka lënë në ‘shock’ adhuruesit e artit të saj, por dhe kolegë e artistë të cilët kanë rikthyer dhe njëherë në vëmendje jetën artistike të një prej zërave më të mrekullueshëm të muzikës shqiptare.

Në një lidhje direkt me Fax News, sopranoja Inva Mula ka kujtuar lidhjet e hershme të familjes së saj me Pagarushën dhe adhurimin për një nga figurat më komplekse të muzikës dhe artit në Shqipëri e Kosovë.

“Ende nuk po mësohem dot me lajmin se Nexhmije Pagarusha ka ndërruar jetë. Më ka trishtuar pa masë. Ishte një model për mua që e vogël, një legjendë e artit shqiptar.
Kujtoj një episod në fillim të viteve ’70 kur Nexhmije Pagarusha erdhi në Tiranë. U mahnita me elegancën dhe bukurinë e saj, një model që se kishim parë të zbriste në rrugët e Tiranës. Ajo të nesërmen interpretoi në Sallën e Operës dhe Baletit, ishte spektakolare.
Ajo shkruajti epokën e saj, nuk ngjante me asnjë artist tjetër. Ishte vokal i veçantë, por nuk ishte vetëm vokali që përcaktoi, por eleganca, interpretimi dhe finesa e një artisteje të madhe. Jetoi në një kohë që nuk ia mundësoi të prekte skena ndërkombëtare.
ishte ënddra e saj të bëhej këngëtare operistike.
Me ‘Bareshën’ ajo krijoi zhanrin ‘Nexhmije Pagarusha’ të cilin askush nuk e arriti dot më.”, u shpreh sopranoja Inva Mula për Fax News.

Një rrëfim emocionuese për veprën dhe artin e Nexhmije Pagarushës solli për Fax News dhe këngëtarja Irma Libohova e cila tejet e mallëngjyer nga kjo humbje rrëfeu se Nexhmije Pagarusha ishte idhulli i adoleshencës së saj:

“Instiktivishht shpirti me çoi që hodha dje një post në Instagram dhe kam kënduar pikërisht këngën e Bareshës së bashku me një koment për të.

Ishte idhull, ëndërr njohja me të. E shikoja prapa kuintave në Teatrin e Operës dhe Baletit, kur isha adoleshente. Për herë të parë dëgjoja një këngëtar që këndonte në 3 oktava.

E kam takuar më pas në Prishtinë, një grua e qetë me një zë emocionues të plotë. I mbaj mend atë buzëqeshjen e bukur, ku i lexohej shpirti. Do ta mbaj mend për vokalin, do të mbaj mend Nexhmijen si aktore, Nexhmijen si njeri”.