Pavarësisht barazimit të sotëm ndaj Pro Verçelit, Piza duket e destinuar të bjerë në Lega Pro në sezonin e ardhshëm. Ndër më të dëshpëruarit për këtë situatë është trajneri Ivan Xhenaro Gatuzo, i cili besonte se mund të shpëtonte skuadrën, por që tashmë duket i dorëzuar edhe ai përballë një fakti thuajse të pakundërshtueshëm.
Megjithatë, në konferencën e sotme për shtyp, ai fillimisht u ka thurur elozhe disa futbollistëve për përkushtimin, duke filluar nga Edgar Çani i cili kishte qenë i dëmtuar por kishte hyrë në fushën e lojës dhe kishte bërë diferencën duke shënuar golin e barazimit 1-1.
“Çanin vetëm duhet ta falënderojmë, mbrëmë në darkë nuk duhej të ishte as i gatshëm për ndeshje, gjuri i kishte mbledhur ujë, por ka shtrënguar dhëmbët dhe u bë pjesë e skuadrës. Kjo më lë të kuptoj profesionalizmin dhe pasioni e këtij djaloshi. Ashtu si Ujkani dhe Di Takio, edhe ata lojtarë që janë në fund të kontratës”, tha Gatuzo para gazetarëve duke lavdëruar këta futbollistë.
Ndërkohë, nuk ka munguar një thumbim në distancë për Rei Manajn, të cilin Piza e mendoi si njeriun gol të pjesës së dytë të sezonit, por nuk rezultoi i tillë. “Me shumë mundësi kemi gabuar me ndonjë futbollist që morëm në janar, por nuk ishte e mundur të bënim më mirë”, tha Gatuzo.
Fjalë të mira për Çanin kishte edhe trajneri kundërshtar, Moreno Longo. “Kemi bërë një pjesë të parë të mirë, nuk ishim cinikë sa duhej për të mbyllur ndeshjen dhe në pjesën e dytë sfida ishte nën kontroll derisa hyri Çani, i cili ndryshoi ekuilibrin e saj”, tha Longo.
Për paraqitjen e tij sot, Çani është vlerësuar me notën 7 nga mediat italiane që kanë vlerësuar formën e jashtëzakonshme që shfaqi në këtë sfidë për pak më shumë se 20 minutat që luajti.
Discussion about this post