Akoma lëkundje në Elbasan, policia inspekton Uzinën e Mjekësit dhe ish-rafinerinë e Cërrikut

Në qytetin e Elbasanit ende vazhdojnë “lëkundjet misterioze”.

Qytetarët besojnë se lëkundjet që nisën një ditë më parë, kanë të bëjnë me veprimet e ndonjë kompani.

Kështu policia shkoi të verifikojë situatën duke e inspektuar zonën nga afër, pas aludimeve për shpërthime në uzinën e Mjekësit dhe ish-Rafinerinë e Cërrikut.

Instituti i Gjeoshkencave një ditë më parë nuk kishte shënuar lëvizje tektonike, por sot konfirmoi se këto dy ditë ka patur disa tërmete në qarkun e Elbasanit. Madje, sipas IGJEUM, tërmeti i fundit magnitudë 2.7 ballë është ndjerë në orën 15:03 rreth 3 km nga Elbasani.

Ndërkohë edhe Zyra e Emergjencave Civile në Prefekturën e Elbasanit, sqaron se bëhet fjalë për tërmet.

 “Gjatë 24 orëve të fundit në Elbasan janë regjistruar 7 lëkundje të lehta të tokës. Lëkundja më e fortë ka qenë 3,6 ballë në Jug të Elbasanit në zonën midis Mjekësit dhe Kuqanit. Nuk ka dëme materiale. Nga lëkundjet është krijuar panik pasi kanë qenë të shpeshta”, deklaroi Mustafa Arapi i EC. (D.D/Shuplaka)