Një vajzë 24-vjeçare ka ndërruar jetë si pasojë e një aksidenti të rëndë rrugor që ka ndodhur në aksin Drenas–Skenderaj, konkretisht në fshatin Polluzhë të Komunës së Skenderajt. Shoferi i automjetit ka mbetur i lënduar.
Sipas autoriteteve, njësitet policore nga Stacioni i Drenasit dhe ekipet e emergjencës kanë ndërhyrë menjëherë në vendin e ngjarjes, ndërsa të lënduarit janë transportuar me urgjencë në Qendrën Klinike Universitare të Kosovës (QKUK) në Prishtinë.
Fatkeqësisht, për shkak të plagëve të rënda të marra gjatë aksidentit, vajza nuk ka mundur t’i mbijetojë dhe ka ndërruar jetë në repartin e Emergjencës në QKUK. Drejtori i këtij reparti, Naser Syla, konfirmoi vdekjen e saj, duke thënë se, pavarësisht përpjekjeve të ekipit mjekësor dhe masave të ndërmarra për reanimim, ajo nuk arriti të shpëtojë.
“Përkundër të gjitha procedurave dhe përpjekjeve të stafit mjekësor për ta rikthyer në jetë, vajza e lindur në vitin 2001 nuk arriti t’i mbijetojë plagëve”, tha Syla.
