Një person ka humbur jetën mbrëmjen e së enjtes rreth orës 23:00 në Spitalin Rajonal të Prizrenit, pasi pësoi një vetaksident mes fshatrave Shirokë dhe Sopijë në komunën e Suharekës. Lajmin e ka konfirmuar për Telegrafin zëdhënësi i Policisë së Kosovës për rajonin e Prizrenit, Shaqir Bytyqi.
Ai bëri të ditur se në vendin e ngjarjes kanë dalë hetuesit e trafikut dhe është njoftuar edhe prokurori kujdestar.“Më 24 prill 2025, rreth orës 21:26, përmes linjës emergjente policia është informuar për një vetaksident të ndodhur mes fshatrave Shirokë dhe Sopijë në Suharekë. Menjëherë janë njoftuar njësitë relevante, përfshirë emergjencën dhe patrullat policore që kanë dalë në vendngjarje. I lënduari, E.K. nga fshati Sopijë, fillimisht është dërguar në emergjencën e Suharekës, por për shkak të gjendjes së rëndë është transferuar në Spitalin Rajonal të Prizrenit. Rreth orës 23:00, spitali ka konfirmuar se i lënduari ka ndërruar jetë. Hetuesit e trafikut kanë kryer procedurat në vendin e ngjarjes, ndërsa është njoftuar edhe prokurori kujdestar”, tha Bytyqi.
