Në vijim të informacionit të dhënë ditën e djeshme, për një aksident në aksin rrugor “Shkodër – Lezhë”, ju informojmë se specialistët e Sektorit të Policisë Rrugore arrestuan shtetasin A. S., 63 vjeç, banues në Tiranë, për veprën penale “Shkelja e rregullave të qarkullimit rrugor”.
Specialistët e Sektorit të Qarkullimit Rrugor referuan materialet në Prokurori, ku nisi procedimi në gjendje të lirë për shtetasin Italian L. R., 63 vjeç, pasi ditën e djeshme në aksin rrugor “Shkodër-Lezhë”, duke drejtuar motomjetin e tij, si shkak i një parakalimit të gabuar, është përplasur me automjetin me drejtues shtetasin P. M., 47 vjeç, banues në fshatin Baks-Rrjoll. Si pasojë është dëmtuar lehtë shtetasja M. B., bashkëshortja e shtetasit L. R., pasagjere në motomjet.
Gjithashtu, specialistët e Sektorit të Qarkullimit Rrugor referuan materialet në Prokurori, për njoftim fakti, pasi ditën e djeshme në fshatin Trush shtetasi S. L., 50 vjeç, dyshohet se ka humbur kontrollin mbi drejtimin e motomjetit dhe si pasojë motomjeti është rrëzuar. Nga aksidenti është dëmtuar shtetasi S. L., i cili po merr mjekim në Spitalin e Traumës, Tiranë.
Specialistët për Hetimin e Krimeve të Komisariatit të Policisë Shkodër referuan materialet në Prokurori, për shtetasin Gj. P., 71 vjeç, pasi nga kontrollet e kryera në bashkëpunim me shërbimet e OShEE-së, në banesën e tij, u konstatua lidhje e paligjshme e energjisë elektrike.
Specialistët për Hetimin e Krimeve të Stacionit të Policisë Fushë Arrëz referuan materialet në Prokurori, për shtetasit:
-Z. K., 63 vjeç, dhe Gj. K., 66 vjeç, pasi nga kontrollet e kryera në bashkëpunim me shërbimet e OShEE-së, në një subjekt Zdrukthëtari, u konstatua lidhje e paligjshme e energjisë elektrike;
-Gj. F., 74 vjeç, banues në fshatin Porav, për veprat penale “Shkatërrim prone” dhe “Vetëgjyqësia”, pasi me vetëgjyqësi, ka prerë disa tuba uji të shtetasit Gj. I., 56 vjeç, banues në Porav.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
–
Informacion paraprak/Rreth orës 12:40, në Theth, shtetasi V. A., 63 vjeç, dyshohet se ka humbur kontrollin mbi drejtimin e motomjetit dhe si pasojë motomjeti është rrëzuar. Nga aksidenti është dëmtuar shtetasi V. A., i cili ndodhet nën kujdesin e mjekëve.
Grupi hetimor po punon për zbardhjen e rrethanave të aksidentit.
