Aksidenti me dy të vdekur në Kavajë, policia arreston Halil Kokën

Policia e Kavajës ka vënë në pranga Halil Kokën, si autor të aksidentit që ndodhi mëngjesin e sotëm ku humbën jetën dy persona.

Fax News raporton se pas hetimeve, rezultoi se drejtuesi i mjetit që shkaktoi aksidentin me dy të vdekur ishte pikërisht 40-vjeçari Halil Koka.

Policia bën të ditur se dy ditë më parë Kokës i ishte hequr leja e qarkullimit rrugor, dhe për këtë arsye i kishte kërkuar bashkëudhëtares së tij, Ilda Parrojit të mbante përgjegjësinë e aksidentit.

Mirëpo pas  hetimeve policore rezultoi se shtetasja Ilda Parroji, ishte pasagjere në këtë mjet, megjithëse në deponimet e para në vendngjarje deklaroi se e drejtonte ajo mjetin kur ndodhi aksidenti.

Materialiet do t’i kalojnë Prokurorisë pranë Rrethit Gjyqësor Kavajë për veprime të mëtejshme.

Aksidenti ndodhi mëngjesin e sotëm rreth orës 07:40, në afërsi të Malit të Robit, në aksin rrugor Durrës-Kavajë.

Si pasojë mbetën të vdekur shtetasit Xhemil Fisku dhe Edlira Fisku, përkatësisht vjehërr dhe nuse.

Nipi i vogël 8-vjeçar, Xhemsi Fisku ndodhet në gjendje të rëndë në Spitalin e Tiranës së bashku me një kushëri të familjes 20-vjeç, i cili u plagos lehtë.

Mendohet se mjeti ka dalë nga rruga dhe ka përplasur këmbësorët, të cilët ishin duke pritur në stacion.

Familja Fisku ka hapur sot dyert e mortit, ndërkohë që trupat e viktimave nuk kanë ardhur ende në banesë por ndodhen në morgun e qytetit të Durrësit.

NJOFTIMI  I POLICISË

Specialistët e Hetimit të Krimit në Komisariatin e Policisë Kavajë në bashkëpunim me Prokurorine kanë arrestuar në flagrancë drejtuesin e mjetit tip “Toyota” shtetasin Halil Koka, 40 vjeç, banues në Durrës.

Pas disa veprimeve hetimore, shërbimet e Policisë kanë dokumentuar se ishte ky shtetas drejtuesi i mjetit që shkaktoi aksidentin rreth orës 07:40 tek Mali i Robit, ndërsa shtetasja I.P., rezultoi se ishte pasagjere në këtë mjet, megjithese në deponimet e para në vendngjarje deklaroi se e drejtonte ajo mjetin kur ndodhi aksidenti.

Rrjedhimisht shtetasja Parroji do të akuzohet pë dëshmi të rreme.

Materialiet do t’i kalojnë Prokurorisë pranë Rrethit Gjyqësor Kavajë për veprime të mëtejshme.

(F.M/Faxweb)