Burime për Fax News, bëjnë me dije se në datën 6 qershor, ka ndodhur një aksident ku një efektiv policie, ka përplasur me motorr 33 vjeçarin në Durrës, dhe më pas është larguar nga vendngjarja pasi raportohet të ketë qenë i dehur.
Policia ndryshe nga herët e tjera që publikon çdo lloj njoftimi përsa i përket zhvilimeve apo ngjarjeve kriminale të ndodhura në vend, këtë herë nuk tha asgjë për ngjarjen, gjersa ditën e sotme ka ardhur reagimi nga Drejtoria Rajonale e SHÇBA Durrës-Kavajë.
Drejtoria Rajonale e SHÇBA Durrës-Kavajë nën drejtimin e Prokurorisë së Rrethit Gjyqësor Durrës, referoi materialet procedurale në Prokurorinë pranë Gjykatës së Shkallës së Parë Durrës, në ngarkim të punonjësit të policisë, i arrestuar në flagrancë, Inspektor paulin Pjeter Gjoka 52 vjeç, me detyrë Oficer i Patrullës së Përgjithshme pranë Komisariatit të Policisë Durrës, për veprat penale të “Shkeljes së rregullave të qarkullimit rrugor”; “Drejtim i mjetit motorik në mënyrë të pa rregullt” dhe “Largimi nga vendi i aksidentit“.
Arrestimi në flagrancë i punonjësit të policisë Inspektor P.P. u krye pasi më datë 06.06.2021, rreth orës 22:30, në lagjen nr. 18, rruga “Sulejman Pitarka”, duke drejtuar mjetin ka aksidentuar rëndë një shtetas 33-vjeçar, i cili ndodhet në gjendje të rëndë shëndetësore nën kujdesin e mjekëve.
Nga veprimet e para hetimore rezulton se punonjësi i policisë P. P. ka qenë nën efektin e pijeve alkolike dhe pasi ka kryer aksidentin është larguar nga vendngjarja.
SHÇBA mbetet e përkushtuar në misionin e saj për garantimin e zbatimit të ligjit dhe fton qytetarët të denoncojnë çdo rast të shkeljes së ligjit, duke telefonuar në numrin e gjelbër 0800 90 90.
(B.V/Faxweb.al)
