Policia e Fierit ka ndaluar me urdhër të prokurorisë të riun Sabri Xherimeja, i cili ishte në makinën benz që doli nga rruga mbrëmjen e djeshme, e për pasojë humbi jetën 19-vjeçarja Xhesika Mjekra.
Policia thotë se ndalimi i 21-vjeçarit është bërë me qëllim zbardhjen e ngjarjes dhe rrethanave të saj.
Njoftimi i policisë:
Në vijim të veprimeve hetimore për zbardhjen e shkaqeve të aksidentit të ndodhur dhe për të përcaktuar me prova ligjore drejtuesin e automjetit që ka dalë mbrëmë nga rruga ku humbi jetën 19-vjeçarja Xh. M., me urdhër të Prokurorit është bërë ndalimi i shtetasit S. Xh., 21 vjeç, banues në Tiranë, në funksion të veprimeve hetimore për zbardhjen e ngjarjes.
Materialet i kaluan Prokurorisë, për veprime të mëtejshme.
Një aksident tragjik ndodhi dje para mesnatës në Fier -Vlorë, ku humbi jetën 19-vjeçarja Xhesika Mjekra, dhe u plagos 21-vjeçari Sabri Xherimeja. Faxweb.al ka siguruar dhe foton e viktimës, ndërkohë që familjarët mes dhimbjes njoftojnë se përcjellja për në banesën e fundit do të bëhet sot në mesditë në Tiranë.
Dyshimet janë se aksidenti ndodhi për shkak të errësirës në rrugë, ndërsa në drejtimin e mjetit ishte vetë 19-vjeçarja, e cila nuk i shpëtoi dot plagëve të marra. I riu që ishte pasagjer në mjet u dërgua me plagë të shumta për në spitalin e Fierit, ku fatmirësisht ndodhet jashtë rrezikut për jetën.
Në zonën ku ndodhi aksidenti mungon ndriçimi dhe sinjalistika, pavarësisht se është një aks rrugor i ndërtuar së fundi, ndërkohë që policisë mbrëmjen e djeshme iu deshën disa minuta për të gjetur vendin se ku makina e dy të rinjve kishte dalë nga rruga.
(E.K/Faxweb.al)
Discussion about this post