Në plazhin e Velipojës, Shkodër u zhvillua fundjavën që lamë pas një aksion pastrimi.
Ky aksion u organizua nga të rinjtë vullnetarë të Eko Mendjes, të cilët vazhdojnë të japin një shembull të shkëlqyer shërbimi për komunitetin shkodran.
Kryeministri Edi Rama ndau sot pamje nga ky aksion, ku të rinjtë pastruan territorin e plazhit të Velipojës nga mbeturinat.
“Aksion pastrimi në Velipojë”, shkruan Rama.
Aksioni i pastrimit të të rinjve u nda në rrjetet sociale edhe nga kryebashkiaku i Shkodrës, Benet Beci, i cili shprehu mirënjohjen për kontributin e vazhdueshëm të të rinjve të Eko Mendjes, për ta bërë Shkodrën një qytet të pastër e modern.
Në Velipojë është bërë një ndryshim shumë i dukshëm sa i përket punës për lirimin e hapësirave publike dhe sistemimit estetik të zonës, si dhe mbajtjen pastër të saj.
Këto ndryshime kanë sjellë vitet e fundit një frekuentim të lartë të plazhit të Velipojës nga pushues vendas e të huaj.
