Një aksion masiv për gjetjen dhe kapjen e Klemend Balilit, ka nisur në mesnatë. Në mbështetje të Policisë së Shtetit dhe forcave lëvizëse operacionale FLO, janë angazhuar rreth 200 forca policore të Policisë Sarandë dhe asaj të Gjirokastrës, referuar burimeve për “News24”.
Bëhet e ditur se policia po ushtron kontrolle territori në banesën dhe bizneset e “Escobarit të Ballkanit” (siç e cilësojnë mediat greke), pas informacioneve të marra në rrugë operative. Aksioni që ka ngritur “në këmbë” policinë, është shtrirë edhe në Delvinë dhe zonat përreth.
Aktualisht, prokurorët e Task Forcës, janë duke hetuar pasuritë dhe llogaritë bankare të Balilit, për t’ju drejtuar më pas Gjykatës me kërkesën për sekuestro konservative deri në përfundim të hetimeve ndaj tij.
Operacioni vjen disa ditë pas autoritetet greke dorëzuan në Prokurorinë shqiptare një dosje voluminoze prej 10 mijë faqesh. Ndërkohë që dy ditë më parë, u bë e ditur se në fund të muajit Tetor u zhvillua një tjetër operacion për kapjen e tij, i cili nuk rezultoi i suksesshëm. Një grup i forcave të posaçme operacionale të Drejtorisë së Përgjithshme të Policisë u angazhua për kapjen pas informacioneve se një mbrëmje Balili do të kalonte me një automjet në qafën e gjashtës, në hyrje të qytetit të Sarandës.
Por policia mundi të ndalojë vetëm dy persona të afërm të tij. Burime për “TCH” u shprehën se informacioni i 6 javëve më parë për lëvizjen e Balilit në këtë aks ishte i saktë, por dyshohet se dështoi për shkak të dekonspirimit të operacionit.
