Pak minuta më parë ka nisur në Gjykatën e Durrësit seanca gjyqësore për nëntë personat e arrestuar gjatë aksionit të policisë pas shembjes së godinave pas tërmetit të 26 Nëntorit.
Ndërtues, pronarë, zyrtarë dhe hartues projektesh gjenden para trupës gjykuese për t’u njohur me vendimin, ndërsa mësohet se dy prej të arrestuarve nuk gjenden në sallën e gjyqit.
Sipas avokatëve të Nevjana Isufit (hartuese e projekteve fiktive) dhe Avdulla Osmanit (ndërtues informal), ata janë dërguar në spital me urgjencë dhe janë në gjendje të rënduar shëndetësore. Më poshtë do të gjeni emrat e të gjithë të arrestuarve dhe sa vite burg rrezikojnë:
1-Arben Isaku, 42 vjeç, me detyrë ish-drejtor i ALUIZNI-it Durrës, i dyshuar si autor i veprës penale “Shpërdorimi i detyrës”. Rrezikon deri në 7 vite burg
2-Klajdi Lame, 32 vjeç, në cilësinë e inspektorit të Inspektoratit Ndërtimor Urbanistik Durrës, në objektin pallat 6- katësh, i cili ndodhet në lagjen Nr. 6, rruga “Shoqëria Bashkimi”, ku humbën jetën dy shtetase, i dyshuar si autor i veprës penale “Shpërdorimi i detyrës”. Rrezikon deri në 7 vite burg
3-Albrend Qetka, 35 vjeç, në cilësinë e specialistit të verifikimit në terren pranë ALUIZNI-it, Durrës, në objektin pallat 6- katësh, i cili ndodhet në lagjen Nr. 6, rruga “Shoqëria Bashkimi”, ku humbën jetën dy shtetase, i dyshuar si autor i veprës penale “Shpërdorimi i detyrës”. Rrezikon deri në 7 vite burg
4-Kujtim Hasa, 53 vjeç, në cilësinë e shefit të shërbimeve të shtëpisë së pushimit të Ministrisë së Brendshme, i dyshuar si autor i vepres penale “Vrasja me dashje”. Rrezikon deri në 25 vite burg
5-Ahmet Doda, 52 vjeç, në cilësinë e drejtorit të shtëpisë së pushimit të Ministrisë së Brendshme, i dyshuar si autor i veprës penale “Shpërdorimi i detyrës”. Rrezikon deri në 7 vite burg
6-Rruzhdi Xheka, 79 vjeç, në cilësinë e ndërtuesit informal në objektin “Hotel Mira Mare”, ku humbën jetën 2 shtetas, i dyshuar si autor i veprës penale “Vrasja në rrethana të tjera cilësuese”. Rrezikon deri në 35 vjet burg
7-Avdulla Osmani, 61 vjeç, në cilësinë e ndërtuesit informal të legalizuar më vonë në menyrë të paligjshme të objektit “Hotel Tropikal”, ku humbën jetën 2 shtetas kosovarë, i dyshuar si autor i veprës penale “Vrasja në rrethana të tjera cilësuese”. Rrezikon deri në 35 vjet burg
8-Defrim Celami, 44 vjeç, në cilësinë e specialistit që ka përpiluar aktin e ekspertimit teknik në objektin pallat 6- katësh, i cili ndodhet në lagjen Nr. 6, rruga “Shoqëria Bashkimi”, ku humbën jetën dy shtetase, i dyshuar si autor i veprës penale “Shpërdorimi i detyrës. Rrezikon deri në 7 vjet burg
9- Nevjana Isufi, 45 vjeçe, e cila me studion e saj private hartonte projekte fiktive, e dyshuar si autore e veprave penale “Shpërdorimi i detyrës” dhe “Falsifikimi i dokumenteve”. Rrezikon deri në 7 vjet burg.
