Policia e Kosovës sot ndërmori një aksion të gjerë në vend kundër kontrabandës e krimit të organizuar duke arrestuar dhjetëra zyrtarë, përfshirë edhe policë në veri të vendit.
Nga ky operacion u vunë pas hekurave 19 punonjës policorë – 11 serbë, 4 shqiptarë dhe 4 boshnjakë.
Policët e arrestuar në aksionet e sotme policore në vend janë dërguar në paraburgim dhe mësohet se u është caktuar masa e ndalimit prej 48 orësh, raporton KTV.
Ndërkohë lidhur me aksionin e policisë kosovare ka reaguar edhe ministria e Punëve të Jashtme e Rusisë, duke thënë se arrestimi i disa serbëve në veri të Kosovës është një provokim që po e bënë Kosova.
Zëdhënësja e kësaj ministrie, Maria Zakharova, ka thënë se këto veprime të palës kosovare po vijnë se pasojë e mos reagimit të BE-se dhe SHBA-së.
“Zyrtarët e Kosovës tashmë janë mësuar që askush nuk reagon ndaj provokimeve të tyre”, ka thënë ajo.
Sipas tyre, ky moment i ndërhyrjes së Policisë së Kosovës në Veri, është zgjedhur pikërisht në kohën kur presidenti serb, Aleksander Vuçiç, po fliste në parlamentin serb për çështjen e Kosovës.
“MPJ e Rusisë u bënë thirrjeve udhëheqësve ndërkombëtare në Prishtinë, që të parandalojnë përshkallëzimin e mëtejshëm të konfliktit”, thuhet ndër të tjera.
Zakharova ka thënë se kjo ndërhyrje e forcave speciale të Kosovës në komunat serbe dërgon në “përshkallëzim të tensioneve ndëretnike, që privojnë përpjekjet shumvjeçare të komunitetit ndërkombëtar për të zgjidhur në mënyrë paqësore gjithë konfliktin”, raporton gazeta express.
Për aksionin të Policia e Kosovës në veri, ka reaguar më herët edhe Presidenti i Kosovës, Hashim Thaçi I cili tha ndër të tjera për mediat kosovare se është arrestuar edhe një shtetas rus, i cili është punonjës e i misionit të UNMIK-ut.
Nderkohe, Misioni i Kombeve të Bashkuara në Kosovë, UNMIK-u ka kërkuar lirimin e dy punonjësve të vet të cilët janë ndaluar sot gjatë operacionit të zhvilluar nga Njësia Speciale e Policisë së Kosovës në veri.
Përmes një publikimi për media, nga UNMIK kanë deklaruar se po përcjellin me shqetësim zhvillimet e fundit në Kosovë.
“UNMIK-u po përcjell me shqetësim të madh zhvillimet në veri të Mitrovicës sot, duke përfshirë këtu ndalimin e dy personave që janë punëtorë të UN gjatë aksionit të Policisë. Të dy pjesëtarët e stafit janë transferuar në spital për trajtim të lëndimeve. Ne jemi duke shikuar rrethanat e sakta në koordinim të plotë me të gjitha organizatat ndërkombëtare në terren”, thuhet ndër të tjera në deklaratën e UNMIK-ut.
Përfaqësuesi special i sekretarit të përgjithshëm të OKB-së në Kosovë, Zahir Tanin ka bërë thirrje për lirim të menjëhershëm të stafit të UNMIK-ut, duke shtuar se “çdo lëndim i pjesëtarëve të UNMIK-ut do të ketë përgjigje të lartë ligjore diplomatike dhe ndërkombëtare”.
Ndërkohë mësohet se dy pjestarë të Policisë së Kosovës janë duke u trajtuar në spitalin e Mitrovicës pas aksionit të sotëm në veri.
Drejtori në Spitalin e Mitrovicës, Zahir Musa, ka thënë se një polic, i cili është plagosur gjatë këtij aksioni, është duke u trajtuar në repartin e kirurgjisë dhe është jashtë rrezikut për jetën.
Gjithashtu, një koleg i tij i cili kishte qenë afër tij, ka marr disa gërvishtje dhe është duke u trajtuar në këtë spital.
Musa ka thënë se pas marrjes së terapisë, ata do të lirohen për trajtim në shtëpi.
Sipas Drejtorit në Spitalin e Mitrovicës, janë disa policë të tjerë të cilët janë duke u trajtuar në këtë spital por që sipas Musës, asnjeri prej tyre nuk ka lëndime serioze.
Rreth 30 persona janë arrestuar të martën nga aksioni i gjerë i Policisë së Kosovës shumica pre3j të cilëve janë zyrtarë. Në mesin e të arrestuarve ka komandantë policie, policë e doganierë.
Vetëm në rajonin e Prizrenit mësohet se janë arrestuar katër doganierë e shtatë kontrabandistë.
(F.GJ/FAXWEB.AL)
Discussion about this post