Pas mbledhjes së Kryesisë së PS-së Elisa Spiropali, u shpreh se kjo forcë politike do të nisë procedurat për shkarkimin e presidentit Meta ditën e enjte.
“Kryesia e PS ka diskutuar mbi aktin brutal të Ilir Metës ndaj republikës së Shqipërisë. Në seancën e së enjtes ne do të kemi një debat të gjerë, mbi një institucion të ri, të quajtur ç’dekretim.
Ne si Kryesi mendojmë se Ilir Meta e ka humbur të drejtën për të qëndruar në atë pozicion, Kuvendi do të nisë procedurat për shkarkimin e Ilir Metës”, u shpreh Spiropali. E pyetur për mungesën e Gjykatës Kushtetuese, Spiropali tha se PS do të nisë procedurat për shkarkimin e Metës, pavarësisht se fjala e fundit për shkarkimin i mbetet Kushtetueses.
“Do t’i takojë Gjykatës Kushtetuese në fund por kjo nuk na heq në të drejtë për të nisur procedurat për shkarkimin e tij”, tha më tej zëdhënësja e qeverisë.
Kujtojmë se në këto dy ditë pas deklaratës së Metës, Rama ka vijuar fushatën e tij në disa qytete të vendit , duke thënë se zgjedhjet do të mbahen në 30 Qershor dhe kjo është e panegociueshme.
Meta, në konferencën e jashtëzakonshme që mbajti sot në mëngjes, u shpreh se presidenti është i vetmi organ kushtetues që mund të vendosë për datën e zgjedhjeve qoftë lokale, qoftë ato qendrore, duke iu përgjigjur në këtë mënyrë dhe pretendimeve të kryeministrit Rama.
Presidenti theksoi se ai kishte grumbulluar të dhëna se në rast se në 30 Qershor do të mbaheshin votime, vendi mund të shkonte drejt një konflikti civil me pasoja shumë të rënda për vendin.
Meta tha më tej se në rast se zgjedhjet do të mbaheshin në 30 Qershor, pa opozitën, atëherë vendi do të kthehej në një regjim diktatorial, ku qytetarët do të detyroheshin që të përballeshin me njëri-tjetrin.
Presidenti komentoi më tej dhe protestat e opozitës, duke thënë se në disa raste ka pasur tejkalim të kompetencave nga ana e policisë, duke u përgjigjur në mënyrë jo propocioonale. (Lexo edhe ketu)
(E.K/Faxweb.al)
