Një akt terrorist ka ndodhur pak minuta më parë në xhaminë “Dine Hoxha” në Tiranë, ku shtetasi Rudolf Nikolli ka plagosur me thikë 5 persona. 34-vjeçari është neutralizuar nga punonjësit e Policisë së shtetit, ndërkohë që 5 të plagosurit janë jashtë rrezikut për jetën.
Konflikti ka ndodhur në ambientet e brendshme të xhamisë, ndërkohë që nuk dihet nëse vetë Nikolli ka qenë besimtar, apo person që mund të ketë probleme me shëndetin mendor.
Mësohet se të plagosurit janë besimtarë myslimanë dhe punonjës të xhamisë, ndërkohë që veprimi i shpejtë i policisë ka bërë që të shmangeshin pasoja më të rënda të kësaj ngjarjeje.
Njoftimi i Policise:
Rreth orës 14:30, në Rrugën e Kavajës, një shtetas është futur në ambientet e një kulti fetar (xhami) dhe në rrethana ende të paqarta ka plagosur me mjet prerës 5 shtetas.
Falë reagimit profesional dhe të menjëhershëm të shërbimeve të Policisë është bërë i mundur neutralizimi dhe prangosja e autorit të dyshuar, shtetasi Rudolf Nikolli 34 vjeç, nga Burreli, i cili po shoqërohet në ambientet e Drejtorisë Vendore të Policisë Tiranë, për veprime të mëtejshme.
Ndërkohë, shërbimet e Policisë iu kanë dhënë ndihmën e parë shtetasve të lënduar, të cilët janë transportuar në spital, për ndihmë mjekësore dhe ndodhen jashtë rrezikut për jetën
Në vendngjarje ka mbërritur grupi hetimor dhe nën drejtimin e Prokurorisë vijon puna për sqarimin e rrethanave dhe dokumentimin e plotë ligjor të ngjarjes.
Faxweb.al siguroi dhe pamje nga momenti jashtë xhamisë ku dhjetra persona së bashku me policinë u angazhuan për të neutralizuar agresorin.
(E.K/Faxweb.al)
