Autoriteti Kombëtar i Ushqimit ka sqaruar situatën mbi rastet e helmimit në Kopshtin Nr. 1 të qytetit të Gramshit.
Sipas AKU-së, pas të gjitha analizave të kryera, treguesi Salmonelë ka rezultuar negativ te subjekti prodhues dhe furnizues, ndërsa infektimi ka ndodhur në ambientet e institucionit arsimor.
AKU thotë se mostrat e marra në subjektin e furnizuar nga prodhuesi dhe njëkohësisht furnizues i Kopshtit Nr. 1 Gramsh kanë rezultuar negative për treguesin Salmonella spp.
Mostrat e marra në subjektin Kopshti Nr. 1 Gramsh rezultojnë me prezencë të Salmonella spp.
AKU thotë se nga këto informacione të marra deri në këto momente, mendohet se kontaminimi i vezëve në Kopshtin Nr. 1 Gramsh ka ndodhur në ambientet e institucionit, nga faktorë të tjerë që nuk lidhen me produktin ushqimor (pra jo nga produkti vezë).
AKU thekson se analizat e konfirmuara, sipas këtij informimi publik, në lidhje me rezultatet negative për Salmonella spp te subjekti prodhues dhe furnizues, nxjerrin në pah pasaktësinë e postimeve të caktuara në rrjetet sociale.
“Duhet mbajtur parasysh se në të ardhmen kushdo që do të bëjë deklarata të papërgjegjshme apo të pasakta mund të jetë objekt i një procedimi penal,” thuhet në njoftimin e AKU-së.
Njoftimi i plotë i AKU-së:
Në lidhje me situatën e ndodhur në Kopshtin Nr. 1, në qytetin e Gramshit, sqarojmë opinionin publik se Autoriteti Kombëtar i Ushqimit, pas verifikimeve zyrtare të gjurmueshmërisë për produktin vezë, konfirmon:
Mostrat e marra në subjektin prodhues të vezëve kanë rezultuar negative për treguesin Salmonella spp. Gjithashtu, nga komunikimi me Shërbimin Veterinar Rajonal pranë AKU, është bërë e ditur se ferma e shpendëve është testuar gjatë muajit maj 2025 për salmonelozë, dhe rezultati ka qenë negativ (shpendë të shëndetshëm).
Mostrat e marra në subjektin e furnizuar nga prodhuesi dhe njëkohësisht furnizues i Kopshtit Nr. 1 Gramsh kanë rezultuar negative për treguesin Salmonella spp.
Mostrat e marra në subjektin Kopshti Nr. 1 Gramsh rezultojnë me prezencë të Salmonella spp.
Nga këto informacione të marra deri më tani, mendohet se kontaminimi i vezëve në Kopshtin Nr. 1 Gramsh ka ndodhur në ambientet e vetë kopshtit, nga faktorë të tjerë që nuk lidhen me ushqimin (jo nga produkti vezë).
Vlen të theksohet se nga komunikimi me njësitë e NjKVSh-së, nuk kemi pasur raste të tjera problematike me Salmonella spp., për të cilat jemi në komunikim të vazhdueshëm ndërinstitucional.
Nga ana tjetër, postime të shpërndara në rrjete të caktuara sociale, të ndryshme nga ky njoftim zyrtar i AKU-së, janë të pasakta dhe përbëjnë dezinformim publik.
Kjo për arsye se komentet mbi ngjarjen dhe rezultatet e analizave nuk mund të kufizohen vetëm në komentimin e mostrave të marra nga Kopshti Nr. 1 Gramsh, subjekti i ngjarjes.
Në zbatim të Ligjit Nr. 9863 “Për Ushqimin” (i ndryshuar), si dhe VKM nr. 760, datë 16.09.2015 “Për kërkesat për gjurmimin e ushqimit dhe ushqimit për kafshë përgjatë zinxhirit ushqimor”, saktësohen proceset e gjurmueshmërisë në rastet kur produkti ushqimor rezulton i dëmshëm.
Kushdo që ndjen nevojën për komente në raste të tilla, duhet të presë për sa kohë procesi i gjurmueshmërisë dhe analizat përkatëse nuk kanë dalë për të gjitha hallkat e zinxhirit: nga subjekti i ngjarjes, te furnizuesi dhe deri te prodhuesi.
Duhet mbajtur parasysh se në të ardhmen, kushdo që bën deklarata të papërgjegjshme apo të pasakta, mund të jetë objekt i një procedimi penal.
Analizat e konfirmuara sipas këtij informimi publik të AKU-së, në lidhje me rezultatet negative për Salmonella spp te subjekti prodhues dhe furnizues, nxjerrin në pah pasaktësinë e disa postimeve në rrjetet sociale.
Në zbatim të detyrimeve ligjore dhe me angazhimin e vet të drejtpërdrejtë, në bashkëpunim me institucionet përkatëse, AKU do të mbetet në komunikim të vazhdueshëm në vijim.
