Deputeti i Partisë Socialiste, Vladimir Kosta, ka reaguar ndaj fjalës së kreut të Grupit Parlamentar të LSI-së, Luan Rama, sot në Kuvend.
Në shkrimin e tij, ai shkruan që në fillim se aleatët e PS-së sillen sikur i janë bashkuar qeverisë vetëm gjatë muajve të fundit, ndërkohë që ngre pyetjen se “ku ishin ata gjatë katër viteve?”.
Ai thekson se LSI nuk duhet t’i shmanget përgjegjësisë së saj në raport me trafikun e drogës në vend, pasi kjo parti ka një zëvendësministër në institucionin e Ministrisë së Brendshme.
Në seancën e sotme plenare, Luan Rama deklaroi se është përgjegjësi e mazhorancës që të punojë kundër trafikut të drogës në Shqipëri, duke marrë në konsideratë renditjen e vendit në krye të listave të drogës. Sipas tij, “vëmendja ndaj zgjedhjeve krijon vakum, çka mundet që shfrytëzohet nga trafikantët e drogës”.
Reagimi i deputetit Vladimir Kosta:
LUAN RAMA FOLI SIKUR KA ARDHUR DJE NGA HENA
Aleatët tanë sillen sikur vetëm muajin e fundit janë bërë pjesë e qeverisë. Vetëm keto javë po zbulojnë se reformat nuk janë bërë siç duhet dhe se kanabisi është problem. Ku ishin gjatë katër viteve?
Luan Rama foli në Kuvend sikur ka mbërritur dje nga hëna. Foli sikur nuk e njeh punën e Ministrisë se Brendshme kundër drogës. A nuk ka një zv/ministër në këtë institucion LSI?
LSI nuk duhet ti shmanget përgjegjësisë në raport me drogat në Shqipëri.
Kanë nisur “gjahun” për të gjetur fajtor kur edhe vetë ata janë nxitësit e këtij problemi duke mos denoncuar asnjë rast të vetëm në kohën e zhvillimit të këtij fenomeni.
Nëse do isha në vendin e Edi Ramës nuk do e lejoja më ketë shfaqje dhe sjellje të dëmshme për qeverinë.
(XH.A/SHUPLAKA)
