Ditën e sotme është dhënë alarmi për bombë në Ambasadën shqiptare në Athinë. Për këtë ka reaguar dhe Ministria e Jashtme e Shqipërisë ku ka thirrur ambasadorën greke për ngjarjet e fundit që po ndodhin në Greqi.
“Ambasadorja e Greqisë në Shqipëri, Eleni Surani u thirr sot në Ministrinë për Evropën dhe Punët e Jashtme, në lidhje me ngjarjet e ndodhura në Greqi, duke nisur nga alarmi për bombë pranë Ambasadës tonë në Athinë, djegia e bizneseve shqiptarë, protesta para ambasadës dhe konsullatës tonë si dhe djegia e flamurit kombëtar.” shkruan në njoftim ministria.
Policia greke ka mbërritur menjëherë në ambasadën shqiptare duke kontrolluar për bombën, por që në fund ka rezultuar alarm fals.
Bëhet e ditur se në mediat greke lajmi për alarm bombe në ambasadën shqiptare është tjetërsuar pasi kanë thënë se alarmi është dhënë në Gjykatën e Lartë të Greqisë.
Njoftimi i Ministrisë së Jashtme të Shqipërisë.
Ambasadorja e Greqisë në Shqipëri, Eleni Surani u thirr sot në Ministrinë për Evropën dhe Punët e Jashtme, në lidhje me ngjarjet e ndodhura në Greqi, duke nisur nga alarmi për bombë pranë Ambasadës tonë në Athinë, djegia e bizneseve shqiptarë, protesta para ambasadës dhe konsullatës tonë si dhe djegia e flamurit kombëtar. Ambasadores iu kërkua distancimi dhe në të njëjtën kohë, dënimi nga ana e autoriteteve greke ndaj këtyre akteve të rënda që cenojnë klimën e marrëdhënieve miqësore mes fqinjëve. MEPJ nënvizoi gjithashtu nevojën që autoritetet greke të marrin masat e duhura për të garantuar jetën dhe pronën e shtetasve shqiptarë me banim në Greqi.
(M.Q/Faxweb)
