Alarmohen ekonomistët: Kinezët “blejnë” Portugalinë, porta e depërtimit në BE

Kina po blen thuajse gjithçka në Portugali: spitale, shoqëri sigurimi, gazeta dhe banka, shkruan prestigjiozja “Deutsche Welle”.

Sipas artikullit, ekonomistët dhe biznesmenët janë alarmuar për shtimin e ndikimit kinez.

Por, ndërkohë kryeministri Antonio Costa e konsideron Kinën si shpëtimtare nga kriza dhe do ta zgjerojë edhe më tej bashkëpunimin.

Ndërsa ish-ministri i ekonomisë dhe kryetar i Shoqatës së Bankave, Fernando Faria de Oliveira, deklaroi para një jave se “Bankat portugeze po ndjellin investitorë që nuk janë patjetër të dëshiruar”.

Kjo deklaratë e tij erdhi fill pasi grupi kinez Fosun kishte blerë 16,7% të bankës BCP.

Kjo bankë është banka më e madhe private në Portugali dhe kinezët që tani janë aksionerët më të mëdhej të kësaj banke, duan të blejnë rreth 30% të aksioneve të saj.

Që prej fillimit të krizës në vitin 2011 Republika Popullore e Kinës ka blerë në Portugali në mënyrë masive. Ajo kontrollon ndërkohë sipërmarrjen e energjetikës EDP, ish-koncernin shtetëror të energjisë REN, ka blerë edhe shoqërinë e sigurimeve Fidelidade, si dhe një sërë spitalesh e klinikash.

Ndërsa kohët e fundit një investitor nga Macau, do të blejë shumicën e grupit mediatik Global Media, koncernit më të madh të gazetave portugeze.

Deri tani, Kina ka investuar rreth 13 miliardë euro në Potugali dhe ka vënë nën kontroll disa nga sipërmarrjet më fitimprurëse të vendit.

Në këtë mënyrë, Kina po e përdor në njëfarë mënyre Portugalinë për ta kthyer në një portë për të depërtuar në Evropë.