Kryeqyteti i Francës, Parisi ditën e djeshme ndaloi qarkullimin e automjeteve me targa teke dhe lejoi udhëtimin pa para me metro të qytetarëve. Ky vendim erdhi për shkak të nivelit të lartë ndotjes së ajrit në këtë qytet.
Sipas “AirParif” që monitoron cilësinë e ajrit në rajonin e Parisit, indeksi i cilësisë së ajrit ka arritur në 87, nivel tepër alarmant ky. Të mërkurën do të ndalohet qarkullimi i automjeteve me targa çift, ndërsa parashikohet që niveli i grimcave PM10 në ajër të vazhdojë të jetë i lartë.
Po kështu autoritetet parisiane kanë këshilluar drejtuesit e automjeteve të reduktojnë shpejtësinë në rrugët kryesore të qytetit, duke e ulur limitin nga 80 në 70 km në orë. Ky vendim për masat e reja për uljen e nivelit të ndotjes u prit me me pozitivitet nga qytetarët. “Mendoj se masat do të ndihmojnë me ndotjen. Plus është diçka e bukur të shohësh në rrugët e Parisit vetëm gjysmat e automjeteve që shikon çdo ditë”, tha një qytetare.
